विलास घुले हत्याप्रकरणावरून बीडचं राजकारण तापलं; बजरंग सोनवणेंचा वाल्मिक कराडवर गंभीर आरोप, धनंजय मुंडेंची मुख्यमंत्र्यांशी भेट

बीड : विलास घुले हत्या प्रकरणावरून बीड जिल्ह्यातील राजकीय वातावरण चांगलेच तापले आहे. राष्ट्रवादी काँग्रेस शरदचंद्र पवार पक्षाचे खासदार बजरंग सोनवणे यांनी गुरुवारी पत्रकार परिषद घेत वाल्मिक कराडवर गंभीर आरोप केले. आपल्या मुलाला विलास घुले हत्या प्रकरणात अडकवण्यासाठी कारागृहातून कट रचण्यात आल्याचा दावा सोनवणे यांनी केला असून, त्यासंदर्भातील कथित ऑडिओ क्लिपही माध्यमांसमोर ऐकवली. या ऑडिओची फॉरेन्सिक तपासणी करून संपूर्ण प्रकरणाची चौकशी करण्याची मागणी त्यांनी केली आहे.

दुसरीकडे, माजी मंत्री धनंजय मुंडे यांनी मुख्यमंत्री देवेंद्र फडणवीस यांची सह्याद्री अतिथीगृह येथे भेट घेतली. राज्यातील दुष्काळी परिस्थिती आणि शेतकऱ्यांना तातडीची आर्थिक मदत देण्याच्या मागण्यांवर या भेटीत चर्चा झाल्याची माहिती समोर आली आहे.

‘माझ्या मुलाला अडकवण्यासाठी जेलमधून कट’

बजरंग सोनवणे यांनी पत्रकार परिषदेत दावा केला की, वाल्मिक कराडने कारागृहातून सुग्रीव कराडशी संपर्क साधून त्यांचा मुलगा सौरभ सोनवणे याला विलास घुले हत्या प्रकरणात अडकवण्याचा कट रचला. मृतदेह पोलीस ठाण्यासमोर ठेवणे, पाण्याच्या टाकीवर चढून आंदोलन करणे आणि रास्ता रोको करण्याबाबत कथित संभाषणात सूचना देण्यात आल्याचा आरोप त्यांनी केला. या संभाषणाची ऑडिओ क्लिपही त्यांनी माध्यमांसमोर सादर केली. या दाव्यांची स्वतंत्र अधिकृत पुष्टी अद्याप झालेली नसून सोनवणे यांनी ऑडिओ फॉरेन्सिक तपासणीसाठी पाठवण्याची मागणी केली आहे.

सोनवणे यांनी आपल्या मुलाचा हत्या प्रकरणाशी संबंध नसल्याचा दावा केला. मूळ एफआयआरमध्ये मुलाचे नाव नसल्याचे सांगत नंतरच्या पुरवणी जबाबात त्याचे नाव कशाच्या आधारे समाविष्ट करण्यात आले, याचे उत्तर पोलिसांनी द्यावे, अशी मागणी त्यांनी केली.

गोपीनाथ मुंडेंबाबत बजरंग सोनवणेंनी सांगितला जुना किस्सा

पत्रकार परिषदेत बजरंग सोनवणे यांनी धनंजय मुंडे आणि दिवंगत भाजप नेते गोपीनाथ मुंडे यांच्याशी संबंधित जुना प्रसंगही सांगितला. धनंजय मुंडेंसाठी आपण गोपीनाथ मुंडेंचे पाय धरले होते, असे सोनवणे यांनी सांगितल्याने बीडच्या राजकीय वर्तुळात या वक्तव्याचीही चर्चा सुरू झाली आहे.

धनंजय मुंडेंची मुख्यमंत्री फडणवीसांशी भेट

याच दिवशी धनंजय मुंडे यांनी मुख्यमंत्री देवेंद्र फडणवीस यांची भेट घेतल्याने राजकीय चर्चांना उधाण आले. मात्र, या भेटीत राज्यातील दुष्काळी परिस्थिती आणि शेतकऱ्यांच्या प्रश्नांवर चर्चा झाल्याचे सांगण्यात आले.

राज्यातील दुष्काळग्रस्त भागातील शेतीपिकांच्या नुकसानीचे पंचनामे पूर्ण करून प्रत्यक्ष मदत शेतकऱ्यांच्या खात्यात पोहोचण्यासाठी वेळ लागू शकतो. त्यामुळे तोपर्यंत पीएम किसान योजना आणि नमो शेतकरी सन्मान निधी योजनेंतर्गत पात्र शेतकऱ्यांना किमान दोन हप्ते एकत्रित देण्यात यावेत, अशी मागणी मुंडे यांनी मुख्यमंत्र्यांकडे केली आहे.

परळी आणि अंबाजोगाई तालुक्यातील दुष्काळग्रस्त भागाची पाहणी करून शेतकऱ्यांशी संवाद साधल्यानंतर सरकारकडे तातडीच्या मदतीचा पाठपुरावा करणार असल्याचे मुंडे यांनी यापूर्वी सांगितले होते.

पिण्याचे पाणी, जनावरांसाठी चारा, जलसंधारणाची कामे तसेच शेतकरी आणि शेतमजुरांना आर्थिक आधार देण्यासाठी विविध उपाययोजनांवरही मुख्यमंत्री फडणवीस यांच्यासोबत चर्चा झाल्याचे सांगण्यात आले.

महसूलमंत्री बावनकुळे मराठवाडा दौऱ्यावर

दरम्यान, राज्यातील दुष्काळी परिस्थितीचा आढावा घेण्यासाठी महसूल मंत्री चंद्रशेखर बावनकुळे 2 ऑक्टोबर रोजी मराठवाड्याच्या दौऱ्यावर जाणार आहेत. छत्रपती संभाजीनगर आणि जालना जिल्ह्यांतील दुष्काळग्रस्त भागांना भेट देऊन पिकांच्या नुकसानीची पाहणी तसेच शेतकऱ्यांच्या समस्या जाणून घेण्याचे नियोजन आहे.