विनोद कांबळी वृद्धाश्रमात? व्हायरल व्हिडिओनंतर चाहत्यांमध्ये चिंता; पत्नीने सांगितलं नेमकं काय घडलं!

मुंबई : भारतीय क्रिकेट संघाचे माजी फलंदाज विनोद कांबळी पुन्हा एकदा चर्चेत आले आहेत. ठाण्यातील 'निदान सेंटर फॉर एल्डरली केअर' या वृद्ध सेवा केंद्रातील त्यांचा व्हिडिओ सोशल मीडियावर व्हायरल झाल्यानंतर चाहत्यांनी त्यांच्या प्रकृतीबाबत चिंता व्यक्त केली आहे. मात्र, कांबळी यांचे जुने मित्र आणि माजी प्रथम श्रेणी पंच मार्कस कुटो यांनी त्यांची घरी भेट घेतल्यानंतर प्रकृती स्थिर असल्याची माहिती दिली आहे. तसेच, कांबळी वृद्ध सेवा केंद्रात का जातात, यामागचं कारणही स्पष्ट केलं आहे.

वृद्ध सेवा केंद्रात नेमकं काय म्हणाले कांबळी?

व्हायरल व्हिडिओमध्ये विनोद कांबळी ठाण्यातील निदान सेंटर फॉर एल्डरली केअर येथे बोलताना दिसत आहेत. आपल्यावर सध्या उपचार सुरू असून केंद्रातील सुविधा उत्तम असल्याचं त्यांनी सांगितलं. तेथील कर्मचारी आपल्याला प्रेम आणि आदर देतात. त्यामुळे घरापासून दूर असल्यासारखं वाटत नसल्याचंही त्यांनी नमूद केलं.

हा व्हिडिओ व्हायरल झाल्यानंतर कांबळी वृद्धाश्रमात कायमस्वरूपी राहत आहेत का, असा प्रश्न अनेक चाहत्यांना पडला होता.

मित्राने घरी जाऊन घेतली भेट

कांबळी यांच्या प्रकृतीबाबत चिंता व्यक्त होत असतानाच त्यांचे जुने मित्र मार्कस कुटो यांनी शनिवारी, २६ सप्टेंबर रोजी वांद्रे येथील त्यांच्या घरी जाऊन भेट घेतली.

कुटो यांनी दिलेल्या माहितीनुसार, कांबळी यांची प्रकृती स्थिर आहे. त्यांनी स्वतः नाश्ता केला. पूर्वीच्या तुलनेत ते अधिक सशक्त दिसत असून व्यवस्थित चालत असल्याचंही कुटो यांनी सांगितलं. त्यांच्या स्मरणशक्तीबाबतही कुटो यांनी सकारात्मक माहिती दिली.

व्हायरल व्हिडिओवर कुटुंब नाराज

मार्कस कुटो यांच्या माहितीनुसार, कांबळी यांची पत्नी अँड्रिया हेविट या व्हायरल व्हिडिओमुळे नाराज आहेत. कांबळी यांना आवश्यकतेनुसार वैद्यकीय मदत मिळावी, यासाठी त्या रुग्णालयातील कर्मचाऱ्यांशी संपर्क साधतात.

गरज पडल्यास कर्मचारी कांबळी यांना वृद्ध सेवा केंद्रात घेऊन जातात आणि नंतर पुन्हा घरी सोडतात. त्यामुळे व्हायरल व्हिडिओच्या आधारे कांबळी यांना त्यांच्या कुटुंबाने वृद्धाश्रमात कायमस्वरूपी ठेवल्याचा निष्कर्ष काढणे योग्य ठरणार नाही.

आरोग्याच्या समस्यांशी सुरू आहे संघर्ष

विनोद कांबळी गेल्या अनेक वर्षांपासून आरोग्याच्या समस्यांचा सामना करत आहेत. २०१३ मध्ये त्यांना हृदयविकाराचा झटका आला होता. त्यानंतर त्यांच्यावर अँजिओप्लास्टी करण्यात आली.

डिसेंबर २०२४ मध्ये मूत्रमार्गाचा संसर्ग, चक्कर येणे, ताप आणि स्नायूंना गोळे येणे अशा त्रासांमुळे त्यांना ठाण्यातील रुग्णालयात दाखल करण्यात आलं होतं. सुमारे दोन आठवड्यांच्या उपचारांनंतर त्यांना घरी सोडण्यात आलं.

दरम्यान, माजी क्रिकेटपटू सुनील गावसकर यांच्या चॅम्प्स फाउंडेशनने कांबळी यांना आयुष्यभर दरमहा ३० हजार रुपयांची आर्थिक मदत आणि वैद्यकीय खर्चासाठी वर्षाला अतिरिक्त ३० हजार रुपये देण्याचा निर्णय घेतला आहे.

विनोद कांबळी यांनी भारतासाठी १७ कसोटी आणि १०४ एकदिवसीय अशा एकूण १२१ आंतरराष्ट्रीय सामन्यांमध्ये प्रतिनिधित्व केलं आहे.