धुळे जिल्ह्यातील बोरिस येथील सेंट्रल बँक ऑफ इंडियाच्या शाखेत पीक कर्ज मंजूर होत नसल्याने एका ४४ वर्षीय शेतकऱ्याने आत्महत्येचा प्रयत्न केल्याची धक्कादायक घटना घडली आहे. चिंचवार येथील हिरालाल उत्तम माळी यांनी आवश्यक कागदपत्रे सादर करूनही तीन महिने बँकेत हेलपाटे मारावे लागल्याचा आरोप केला आहे. अखेर बँकेच्या प्रवेशद्वारावर त्यांनी टोकाचे पाऊल उचलण्याचा प्रयत्न केला. मात्र, उपस्थित खातेदारांनी वेळीच हस्तक्षेप केल्याने अनर्थ टळला. या घटनेमुळे बँकेच्या कारभारावर प्रश्नचिन्ह उपस्थित झाले असून संबंधित प्रशासनावर कारवाई करण्याची मागणी होत आहे.
आजारपण आणि कौटुंबिक संकटे दूर करण्याचे आमिष दाखवून धुळ्यातील मजूर कुटुंबाची १ लाख ६० हजार रुपयांची फसवणूक झाल्याचा प्रकार समोर आला आहे. नाशिकच्या गोदाघाटावर अघोरी विधी करत महिलेच्या डोळ्यांत लिंबाचा रस पिळल्याचा, तसेच तिच्या २१ वर्षीय मुलीचा जबरदस्तीने साखरपुडा केल्याचा आरोप आहे. अंधश्रद्धा निर्मूलन समितीच्या मदतीनंतर पोलिसांत गुन्हा दाखल करण्यात आला आहे.
धुळ्यात अन्न व औषध प्रशासनाने लक्झरी बसमधून वाहतूक करण्यात येणारा तब्बल ५,३८५ किलो खवा जप्त केला आहे. या साठ्याची किंमत १६ लाख ५२ हजार १०० रुपये असून, भेसळीच्या संशयावरून १३ प्रकारच्या उत्पादनांचे नमुने प्रयोगशाळेत तपासणीसाठी पाठवण्यात आले आहेत.