जळगाव जिल्ह्यातील भुसावळ तालुक्यातील सुसरी गावाच्या शिवारात शेतात काम करताना विजेचा धक्का लागून अशोक बाबूराव पाटील (५५) आणि सरीता अशोक पाटील (४३) या पती-पत्नीचा मृत्यू झाला. शेतातील विद्युत खांबावरील तुटलेली तार गवतात पडली होती. तिच्या संपर्कात आल्याने प्रथम अशोक पाटील यांना विजेचा धक्का बसला. पतीला वाचवण्यासाठी गेलेल्या सरीता पाटील यांनाही विजेचा धक्का बसला. दोघांना वरणगाव ग्रामीण रुग्णालयात नेण्यात आले; मात्र डॉक्टरांनी त्यांना मृत घोषित केले. येत्या १ नोव्हेंबरला त्यांच्या मुलीचा साखरपुडा होणार होता. या घटनेमुळे पाटील कुटुंबावर दुःखाचा डोंगर कोसळला असून वरणगाव पोलीस या प्रकरणाचा तपास करत आहेत.
पुण्यातील एमपीएससी आंदोलनातून चर्चेत आलेले विद्यार्थी नेते विवेकानंद पाटील यांनी राजकारणात प्रवेश करण्याबाबत आपली भूमिका स्पष्ट केली आहे. पक्षाच्या प्रवक्तेपदासाठी अनेक ऑफर आल्या होत्या, मात्र लाखो रुपये दिले तरी कोणत्याही पक्षाचा प्रवक्ता होणार नसल्याचे त्यांनी सांगितले. विद्यार्थ्यांचे प्रश्न मांडण्यासाठी रस्त्यावर उतरून लढत राहणार असल्याचा निर्धारही त्यांनी व्यक्त केला.
जळगाव रेल्वे स्थानकावर स्वातंत्र्यदिनी RPFची वर्दी घालून फिरणाऱ्या एका तरुणीला सुरक्षा दलाने ताब्यात घेतले. चौकशीत ती RPF कर्मचारी नसल्याचे उघड झाले. प्राथमिक तपासात लग्नाच्या उद्देशाने स्वतःचा प्रभाव वाढवण्यासाठी तिने पोलिसांची वर्दी वापरल्याचे समोर आले आहे. तिच्याकडे काही बनावट कागदपत्रेही आढळल्याने पोलिसांकडून पुढील तपास सुरू आहे.