अन् शिंदेंसमोर शेतकऱ्याच्या अश्रूंचा बांध फुटला! 'तुम्हाला भेटल्यानंतर आत्महत्येचा विचार दूर झाला'; अकोल्यात भावनिक प्रसंग

अकोला : राज्यातील दुष्काळसदृश परिस्थितीच्या पार्श्वभूमीवर उपमुख्यमंत्री एकनाथ शिंदे यांनी बुधवारी अकोला जिल्ह्यातील शेतकऱ्यांच्या बांधावर जाऊन पिकांची पाहणी केली.

यावेळी बाळापूर तालुक्यातील व्याळा गावात शेतकऱ्यांशी संवाद साधताना भावनिक प्रसंग घडला. पावसाअभावी पिकांचे झालेले नुकसान आणि आर्थिक संकटाची व्यथा मांडताना शेतकरी समाधान सुरकर यांना अश्रू अनावर झाले.

'तुम्हाला भेटल्यानंतर आत्महत्येचा विचार दूर झाला'

समाधान सुरकर यांची बाळापूर तालुक्यातील कान्हेरी गवळी गावात पाच एकर शेती आहे. त्यांनी शेतात सोयाबीन आणि तुरीची लागवड केली होती. मात्र, पुरेसा पाऊस न झाल्याने दोन्ही पिके वाळून गेली आहेत. शेतीची झालेली अवस्था आणि कुटुंबासमोरील आर्थिक अडचणी सांगताना सुरकर भावुक झाले.

"मनात आत्महत्येचा विचार आला होता. मात्र, आज तुम्हाला भेटल्यानंतर तो विचार मनातून दूर झाला," असे त्यांनी उपमुख्यमंत्री एकनाथ शिंदे यांच्यासमोर सांगितले. त्यांची व्यथा ऐकल्यानंतर शिंदे यांनी त्यांना धीर दिला आणि संकटाच्या काळात सरकार शेतकऱ्यांच्या पाठीशी असल्याचे आश्वासन दिले.

दुष्काळग्रस्त शेतकऱ्यांच्या बांधावर उपमुख्यमंत्री

अकोला जिल्ह्यातील दधम आणि व्याळा गावांना भेट देत शिंदे यांनी शेतकऱ्यांच्या अडचणी जाणून घेतल्या. शेतातील वाळलेली पिके आणि पाण्याअभावी निर्माण झालेल्या परिस्थितीची त्यांनी पाहणी केली.

दरम्यान, मुख्यमंत्री देवेंद्र फडणवीस यांनीही लातूर, धाराशिव आणि सोलापूर जिल्ह्यांतील दुष्काळग्रस्त भागांचा पाहणी दौरा केला. लातूर जिल्ह्यातील निलंगा येथे मुख्यमंत्र्यांसमोर एका शेतकऱ्याला अश्रू अनावर झाल्याचा प्रसंग समोर आला. पावसाअभावी निर्माण झालेल्या परिस्थितीमुळे शेतकऱ्यांसमोरील संकट अधिक गंभीर बनले असून त्यांना तातडीच्या मदतीची अपेक्षा आहे.