दिल्लीतील आंदोलनानंतर खळबळ; 150 विद्यार्थी जखमी झाल्याचा दावा

नवी दिल्ली : संसद मार्चदरम्यान विद्यार्थ्यांवर दिल्ली पोलिसांनी अमानुष लाठीमार केल्याचा गंभीर आरोप कॉकरोच जनता पार्टीचे संस्थापक अभिजीत दिपके यांनी केला आहे. मंगळवारी जंतरमंतर येथे आयोजित पत्रकार परिषदेत त्यांनी आंदोलनादरम्यान विद्यार्थी आणि विद्यार्थिनींवर पोलिसांनी कठोर कारवाई केल्याचा दावा केला. या घटनेत अनेक विद्यार्थी जखमी झाले असून काही जणांची प्रकृती गंभीर असल्याचा आरोपही त्यांनी केला.

दिपके यांच्या म्हणण्यानुसार, लाठीमारात एका 12 वर्षीय मुलीच्या डोक्याला गंभीर दुखापत झाली. तसेच 15 ते 16 वर्षांच्या काही विद्यार्थिनींना पोलिसांनी मारहाण केल्याचा आरोप त्यांनी केला. एका विद्यार्थिनीच्या गळ्यावर काठीचे फटके बसल्याने ती गंभीर जखमी झाली असून तिच्यावर सध्या रुग्णालयात उपचार सुरू असल्याचे त्यांनी सांगितले. काही विद्यार्थिनींशी गैरवर्तन झाल्याचाही आरोप त्यांनी पत्रकार परिषदेत केला.

विद्यार्थ्यांचे आणखी नुकसान होऊ नये म्हणून संसद मार्च मागे घेण्याचा निर्णय घेतल्याचे दिपके म्हणाले. "आम्ही आंदोलन मागे घेतले, कारण विद्यार्थ्यांचे जीव धोक्यात घालायचे नव्हते. परिस्थिती नियंत्रणात आणण्यासाठी पोलिसांकडे वॉटर कॅननसारखे पर्याय उपलब्ध होते. मात्र, त्यांनी थेट लाठीमाराचा मार्ग स्वीकारला," असा आरोप त्यांनी केला.

या कारवाईत सुमारे 150 विद्यार्थी जखमी झाल्याचा दावा करत दिपके यांनी जंतरमंतर परिसरात दगडांनी भरलेले ट्रक कसे पोहोचले, असा सवाल उपस्थित केला. तसेच पोलिसांसोबत काही सिव्हिल ड्रेसमधील व्यक्तीही विद्यार्थ्यांवर कारवाई करत असल्याचा आरोप त्यांनी केला. या संपूर्ण कारवाईचे नियोजन आधीच करण्यात आले होते, असा दावा त्यांनी केला.

याशिवाय, सामाजिक कार्यकर्ते सोनम वांगचूक यांच्या पत्नी गीतांजली यांच्याशी गैरवर्तन झाल्याचाही आरोप दिपके यांनी केला. एका पोलीस अधिकाऱ्याने त्यांचे केस ओढल्याचा दावा त्यांनी केला. स्वतःवरही लाठीमार झाल्याचे सांगत त्यांनी या संपूर्ण घटनेची न्यायालयीन चौकशी करण्याची मागणी केली.

मात्र, अभिजीत दिपके यांनी केलेल्या या सर्व आरोपांबाबत दिल्ली पोलिसांची अधिकृत प्रतिक्रिया अद्याप समोर आलेली नाही. तसेच या आरोपांची स्वतंत्रपणे पुष्टी झालेली नसल्याने अधिकृत चौकशीनंतरच या प्रकरणाचे नेमके स्वरूप स्पष्ट होणार आहे.