लग्न, प्रेम आणि १ कोटींचा खेळ? केतन अग्रवाल हत्या प्रकरणात पोलिसांचा मोठा खुलासा

लग्नाच्या बहाण्याने घेतले १ कोटी रुपये?

पोलिसांच्या माहितीनुसार, सिया गोयलने केतन अग्रवाल यांच्याशी लग्नाच्या तयारीचे कारण देत त्यांच्याकडून सुमारे "१ कोटी रुपयांची रक्कम" घेतल्याचा संशय आहे. तपास यंत्रणांच्या मते, ही रक्कम लग्नासाठी न वापरता सहआरोपी चेतन चौधरीचा व्यवसाय उभा करण्यासाठी आणि त्याला आर्थिकदृष्ट्या सक्षम करण्यासाठी वापरण्यात आली असावी.

तपासात आर्थिक व्यवहारांचे पुरावे, बँक व्यवहार आणि संबंधित कागदपत्रांची पडताळणी सुरू असून या आर्थिक व्यवहारांचा गुन्ह्याशी नेमका काय संबंध आहे, याचाही शोध पोलीस घेत आहेत.

केतन यांच्या मृत्यूनंतर तीन वर्षे लग्न न करण्याचा होता कथित प्लॅन

पोलिसांच्या तपासानुसार, आरोपींनी हा कट खूप आधीपासून रचला होता. केतन अग्रवाल यांच्या मृत्यूनंतर लगेच विवाह केला तर संशय निर्माण होईल, याची दोघांनाही जाणीव होती.

यामुळे पुढील "तीन वर्षे विवाह न करण्याचा निर्णय" त्यांनी घेतल्याचा पोलिसांचा दावा आहे. या कालावधीत चेतन चौधरीने स्वतःचा व्यवसाय स्थिर करायचा आणि आर्थिकदृष्ट्या सक्षम झाल्यानंतर दोघांनी विवाह करायचा, अशी योजना आखण्यात आल्याचा तपासात संशय व्यक्त करण्यात आला आहे.

तसेच समाजातील संशय कमी व्हावा आणि सियाच्या कुटुंबीयांकडूनही भविष्यात विवाहाला सहज संमती मिळावी, यासाठीच हा कालावधी ठेवण्यात आल्याचे पोलिसांचे म्हणणे आहे.

लोहगडावर ठरला होता सांकेतिक इशारा

१८ जून रोजी लोहगड किल्ल्यावर घडलेल्या घटनेबाबत पोलिसांनी आणखी एक महत्त्वाचा दावा केला आहे.

तपासानुसार, सिया गोयल आणि चेतन चौधरी यांच्यात आधीच एक "सांकेतिक इशारा (कोडवर्ड)" निश्चित करण्यात आला होता. किल्ल्यावर पोहोचल्यानंतर योग्य संधी मिळताच सियाने "पाणी पिण्याच्या किंवा बुटाची लेस बांधण्याच्या बहाण्याने खाली बसायचे", असा त्यांचा पूर्वनियोजित प्लॅन होता. हा इशारा मिळताच चेतन चौधरीने मागून येऊन केतन अग्रवाल यांना दरीत ढकलल्याचा पोलिसांचा संशय आहे.

सियाला इजा होऊ नये यासाठीही होता स्वतंत्र प्लॅन

पोलिसांच्या तपासानुसार, हा सांकेतिक इशारा अशा प्रकारे ठरवण्यात आला होता की, केतन अग्रवाल यांनी स्वतःला वाचवण्यासाठी सियाचा हात पकडण्याचा प्रयत्न केला तरी ती सुरक्षित अंतरावर राहील आणि तिला कोणतीही दुखापत होणार नाही.

ही बाब गुन्ह्याचे नियोजन अत्यंत बारकाईने करण्यात आल्याचे दर्शवते, असा पोलिसांचा दावा आहे.

सीसीटीव्ही टाळण्यासाठी कारऐवजी स्कूटरचा वापर

तपासादरम्यान आणखी एक महत्त्वाची बाब समोर आली आहे. पोलिसांच्या माहितीनुसार, चेतन चौधरीने टोल प्लाझावरील सीसीटीव्ही कॅमेऱ्यांपासून बचाव करण्यासाठी कारऐवजी "स्कूटरचा वापर" केला.

त्याने पुण्याहून लोहगड किल्ल्यापर्यंत सुमारे "९० किलोमीटरचा प्रवास स्कूटरवरून" केल्याचे तपासात समोर आले आहे. या प्रकरणात वापरण्यात आलेली स्कूटर पोलिसांनी जप्त केली असून तिचीही तपासणी सुरू आहे.

"घटनेच्या अवघ्या ३० मिनिटे आधी झाला मोबाईल कॉल"

पोलिसांनी कॉल डिटेल्स रेकॉर्ड (CDR) तपासताना आणखी एक महत्त्वाचा पुरावा समोर आल्याचा दावा केला आहे.

तपासानुसार, घटनेच्या अवघ्या "३० मिनिटे आधी सिया गोयल आणि चेतन चौधरी यांच्यात मोबाईलवर संभाषण झाले होते." हा कॉल हत्येच्या अंतिम नियोजनाशी संबंधित असू शकतो, असा पोलिसांचा संशय आहे. या कॉलमधील माहितीची आणि इतर डिजिटल पुराव्यांची तपासणी सुरू आहे.

१४ जूनलाही झाला होता पहिला प्रयत्न?

तपासात असेही समोर आले आहे की, १८ जूनपूर्वी म्हणजेच "१४ जून रोजीही केतन अग्रवाल यांना ठार मारण्याचा प्रयत्न" करण्यात आला होता.

मात्र, त्या वेळी केतन यांनी झाडाझुडपांचा आधार घेत स्वतःचा जीव वाचवला. त्यावेळी घटनास्थळी साप आल्यामुळे तो अपघाती प्रकार झाला असल्याचे सांगून हा प्रकार दडपण्यात आल्याचा पोलिसांचा दावा आहे.

दोन्ही आरोपी अटकेत; पुढील तपास सुरू

या प्रकरणात सिया गोयल आणि चेतन चौधरी या दोघांनाही अटक करण्यात आली असून त्यांच्याविरोधात "खून, गुन्हेगारी कट रचणे आणि इतर संबंधित कलमांखाली गुन्हे दाखल" करण्यात आले आहेत.

पोलिसांकडून आर्थिक व्यवहार, डिजिटल पुरावे, मोबाईल कॉल रेकॉर्ड, घटनास्थळावरील पुरावे आणि इतर साक्षीदारांच्या जबाबांच्या आधारे तपास सुरू आहे.