कृष्णा नदीचे पुराचे पाणी उजनीत आणून मराठवाड्याचा पाणीप्रश्न सोडवणार; फडणवीसांचे आश्वासन

पुणे : कृष्णा नदीला येणाऱ्या पुराचे अतिरिक्त पाणी उजनी धरणात आणून ते धाराशिव आणि बीड जिल्ह्यांसाठी उपलब्ध करून देण्याची योजना राज्य सरकारकडून राबवण्यात येणार आहे. यासोबतच मराठवाड्याचा पाण्याचा कायमस्वरूपी प्रश्न सोडवण्यासाठी उपाययोजना करण्यात येतील, अशी माहिती मुख्यमंत्री देवेंद्र फडणवीस यांनी दिली.

यंदा मराठवाड्यात दुष्काळाची परिस्थिती निर्माण होण्याची शक्यता लक्षात घेता त्यावर तातडीने उपाययोजना करण्याचे आश्वासनही मुख्यमंत्र्यांनी दिले आहे. विरोधी पक्षांच्या खासदारांसोबत झालेल्या बैठकीत मराठवाड्यातील पाणीप्रश्नावर सविस्तर चर्चा झाली. कृष्णा नदीचे पुराचे पाणी उजनी धरणात वळवून त्याचा उपयोग धाराशिव आणि बीड जिल्ह्यांसाठी करण्याबाबत सरकार सकारात्मक असल्याचे यावेळी स्पष्ट करण्यात आले.

मुख्यमंत्री देवेंद्र फडणवीस यांच्यासोबत झालेल्या बैठकीनंतर खासदार शाहू छत्रपती यांनी बैठकीबाबत समाधान व्यक्त केले. मतदारसंघातील विविध अडचणी आणि विकासकामांबाबत मुख्यमंत्र्यांसोबत चर्चा झाली. काही मतदारसंघांमध्ये भेदभाव होत असल्याची बाबही बैठकीत मांडण्यात आली. सरकारकडून देण्यात आलेल्या आश्वासनांची आता प्रत्यक्ष अंमलबजावणी होणे गरजेचे असल्याचे शाहू छत्रपती यांनी सांगितले.

अमरावतीतील जाळीत कांड प्रकरणावरही बैठकीत चर्चा झाल्याची माहिती खासदार बळवंत वानखेडे यांनी दिली. रुग्णालयांमध्ये वापरण्यात येणाऱ्या व्हेंटिलेटरबाबत तक्रारी असून संबंधित कंपनीला ब्लॅकलिस्ट करण्याची मागणी मुख्यमंत्र्यांकडे करण्यात आल्याचे त्यांनी सांगितले.

धुळे मतदारसंघाशी संबंधित मनमाड-इंदूर रेल्वे प्रकल्पाचाही मुद्दा बैठकीत मांडण्यात आला. या प्रकल्पासाठी जमीन अधिग्रहण सुरू असून त्यामध्ये काही अडचणी निर्माण झाल्या आहेत. या समस्यांवर चर्चा करण्यासाठी स्वतंत्र बैठक घेण्याचे आश्वासन मुख्यमंत्री फडणवीस यांनी दिल्याची माहिती खासदार शोभा बच्छाव यांनी दिली.

दरम्यान, राष्ट्रवादी काँग्रेस (शरदचंद्र पवार) पक्षाच्या खासदार सुप्रिया सुळे यांची मुख्यमंत्री देवेंद्र फडणवीस यांच्यासोबत पुन्हा एकदा बैठक होणार आहे. भोर तालुक्यातील भोंगवली सबस्टेशन आणि प्रस्तावित टॉवर लाईनच्या प्रश्नावर ही बैठक होणार आहे.

मुंबईतील सह्याद्री अतिथीगृह येथे गुरुवारी दुपारी तीन वाजता ही बैठक आयोजित करण्यात आली आहे. बैठकीला सुप्रिया सुळे यांच्यासोबत राष्ट्रवादी काँग्रेसचे स्थानिक आमदार शंकर मांडेकर आणि भाजपचे माजी आमदार संग्राम थोपटे उपस्थित राहणार आहेत.

भोंगवली येथे प्रस्तावित असलेल्या 765 केव्ही क्षमतेच्या GIS सबस्टेशनला तसेच भोर आणि राजगड तालुक्यातील विविध गावांमधून जाणाऱ्या टॉवर लाईनला स्थानिकांकडून विरोध होत आहे. याविरोधात भोर-राजगड सबस्टेशन व टॉवर लाईन हटाव संघर्ष समितीच्या वतीने कापूरहोळ चौकात पुणे-बंगळुरू महामार्गावर रास्ता रोको आंदोलन करण्यात आले होते.

या आंदोलनासह भोंगवली सबस्टेशन आणि टॉवर लाईनसंदर्भातील स्थानिकांच्या मागण्यांवर मुख्यमंत्री फडणवीस यांच्यासोबत होणाऱ्या बैठकीत चर्चा होण्याची शक्यता आहे.

दरम्यान, कृष्णा नदीचे अतिरिक्त पाणी उजनी धरणात आणण्याचा प्रस्ताव आणि मराठवाड्याच्या पाणीप्रश्नावर करण्यात येणाऱ्या उपाययोजनांमुळे धाराशिव, बीडसह दुष्काळग्रस्त भागांना भविष्यात मोठा दिलासा मिळण्याची अपेक्षा व्यक्त केली जात आहे.