NEET-PG 2026 साठी नवे नियम लागू; घराजवळ केंद्र, एकाच शिफ्टमध्ये परीक्षा आणि कडक सुरक्षा

नवी दिल्ली : NEET-PG 2026 परीक्षेला बसणाऱ्या विद्यार्थ्यांसाठी केंद्र सरकारने महत्त्वाचे बदल जाहीर केले आहेत. नव्या नियमांमुळे विद्यार्थ्यांना घराजवळ परीक्षा केंद्र मिळण्याची शक्यता वाढणार असून, परीक्षा शहराची माहितीही आधीच उपलब्ध करून दिली जाणार आहे. याशिवाय प्रत्येक प्रश्नासाठी अधिक वेळ मिळणार असून, परीक्षेतील गैरप्रकार रोखण्यासाठी सुरक्षाव्यवस्था अधिक मजबूत करण्यात आली आहे.

30 ऑगस्ट रोजी होणाऱ्या NEET-PG 2026 परीक्षेच्या तयारीचा केंद्रीय आरोग्यमंत्री जगत प्रकाश नड्डा यांनी आढावा घेतला. परीक्षा सुरक्षित, पारदर्शक आणि कोणत्याही अडचणींशिवाय पार पडावी, यासाठी त्यांनी संबंधित अधिकाऱ्यांना आवश्यक सूचना दिल्या आहेत.

यंदा NEET-PG 2026 परीक्षेसाठी 2 लाख 73 हजार 183 विद्यार्थ्यांनी नोंदणी केली आहे. गेल्या वर्षाच्या तुलनेत उमेदवारांच्या संख्येत तब्बल 12.5 टक्क्यांनी वाढ झाली आहे.

विद्यार्थ्यांना मिळणार पसंतीचे परीक्षा केंद्र

यंदापासून परीक्षा केंद्र वाटपाच्या प्रक्रियेत बदल करण्यात आला आहे. यापूर्वी उपलब्ध जागेनुसार विद्यार्थ्यांना परीक्षा केंद्र दिले जात होते. मात्र आता विद्यार्थ्यांना परीक्षा केंद्रासाठी तीन राज्यांची निवड करण्याची संधी मिळणार आहे.

यामध्ये स्वतःच्या राज्याला पहिले प्राधान्य देणे आवश्यक असेल. त्यामुळे विद्यार्थ्यांना त्यांच्या घराजवळील परीक्षा केंद्र मिळण्याची शक्यता वाढणार आहे.

तसेच परीक्षेच्या अंदाजे तीन आठवडे आधी परीक्षा शहराची माहिती विद्यार्थ्यांना दिली जाणार आहे. त्यामुळे प्रवास आणि निवासाची व्यवस्था करण्यासाठी विद्यार्थ्यांना पुरेसा वेळ मिळणार आहे.

प्रश्नांची संख्या कमी, प्रत्येक प्रश्नासाठी अधिक वेळ

NEET-PG 2026 च्या परीक्षा पद्धतीतही बदल करण्यात आला आहे. यापूर्वी परीक्षेत 200 प्रश्न विचारले जात होते. आता प्रश्नांची संख्या कमी करून 180 प्रश्न करण्यात आली आहे.

हे प्रश्न सोडवण्यासाठी विद्यार्थ्यांना 210 मिनिटांचा वेळ दिला जाणार आहे. त्यामुळे प्रत्येक प्रश्नासाठी आधीपेक्षा जास्त वेळ मिळणार असून, विद्यार्थ्यांना अधिक विचारपूर्वक उत्तरे देता येणार आहेत.

एकाच शिफ्टमध्ये होणार परीक्षा

यंदाची NEET-PG 2026 परीक्षा एकाच शिफ्टमध्ये घेण्यात येणार आहे. त्यामुळे सर्व विद्यार्थ्यांना समान प्रश्नपत्रिका मिळणार असून, मूल्यांकन प्रक्रिया अधिक निष्पक्ष आणि पारदर्शक होण्यास मदत होणार आहे.

पेपरफुटी रोखण्यासाठी सुरक्षा व्यवस्था मजबूत

परीक्षेतील गैरप्रकार, पेपरफुटी आणि बनावट उमेदवारांना आळा घालण्यासाठी कडक सुरक्षा उपाययोजना करण्यात आल्या आहेत.

विद्यार्थ्यांची ओळख पडताळणी आधार आधारित प्रणालीद्वारे केली जाणार आहे. गरज भासल्यास आयरीस बायोमेट्रिक पडताळणी देखील करण्यात येणार आहे.

याशिवाय प्रश्नपत्रिकांच्या सुरक्षेसाठी आधुनिक एन्क्रिप्शन तंत्रज्ञानाचा वापर केला जाणार आहे. परीक्षा प्रक्रियेत कोणताही गैरप्रकार आढळल्यास त्याची तक्रार करण्यासाठी स्वतंत्र ई-मेल सुविधाही उपलब्ध करून देण्यात आली आहे.

340 शहरांमध्ये परीक्षा केंद्रांची व्यवस्था

NEET-PG 2026 परीक्षा देशभरातील सुमारे 340 शहरांमध्ये आणि 1,300 पेक्षा अधिक परीक्षा केंद्रांवर आयोजित केली जाणार आहे.

परीक्षा सुरळीत पार पाडण्यासाठी 60 हजारांहून अधिक कर्मचारी तैनात केले जाणार आहेत. परीक्षा केंद्रांवर सीसीटीव्ही देखरेख, बायोमेट्रिक तपासणी, उमेदवारांची तपासणी, सिग्नल जॅमर आणि थेट निरीक्षण यांसारख्या सुरक्षा उपाययोजना लागू करण्यात येणार आहेत.

केंद्र सरकारच्या या नव्या निर्णयांमुळे NEET-PG 2026 परीक्षा अधिक सुरक्षित, पारदर्शक आणि विद्यार्थ्यांसाठी सोयीस्कर होण्याची अपेक्षा व्यक्त केली जात आहे.