पुण्यात धक्कादायक घटना! मित्रांना ‘पुढच्या जन्मी भेटू’ असा मेसेज करून तरुणाची आत्महत्या
पुण्यातील खराडी परिसरातील हॉटेल गौरव रेसिडेन्सीमध्ये 26 वर्षीय अक्षय कालिदास कांबळे याने आत्महत्या केल्याची घटना 29 ऑक्टोबर रोजी उघडकीस आली. लग्न जमत नसणे, प्रेम करत असलेल्या तरुणीचे दुसऱ्या व्यक्तीशी लग्न होणे आणि आर्थिक अडचणी यांमुळे तो मानसिक तणावात असल्याची प्राथमिक माहिती आहे. आत्महत्येपूर्वी त्याने मित्रांना ‘ही शेवटची भेट, यानंतर पुढच्या जन्मी भेटू’ असा संदेश पाठवला होता. खराडी पोलिसांकडून या प्रकरणाचा तपास सुरू आहे.
पुणे : लग्न जमत नसल्याने, प्रेम करत असलेल्या तरुणीचे दुसऱ्या व्यक्तीसोबत लग्न झाल्याने आणि आर्थिक अडचणींमुळे मानसिक तणावात असलेल्या 26 वर्षीय तरुणाने खराडी परिसरातील एका हॉटेलमध्ये आत्महत्या केल्याची धक्कादायक घटना समोर आली आहे. अक्षय कालिदास कांबळे असे मृत तरुणाचे नाव असून, तो हवेली तालुक्यातील पेरणे फाटा येथील रहिवासी होता. 29 ऑक्टोबर रोजी दुपारी दोनच्या सुमारास तुळजाभवानी नगर येथील हॉटेल गौरव रेसिडेन्सीमध्ये ही घटना उघडकीस आली.
27 ऑक्टोबरपासून हॉटेलमध्ये होता मुक्कामी
पोलिसांनी दिलेल्या माहितीनुसार, अक्षय कांबळे हा कोरेगाव भीमा परिसरातील भारतीय स्टेट बँकेच्या कार्यालयात कंत्राटी पद्धतीने काम करत होता. त्याने 27 ते 29 ऑक्टोबर या कालावधीसाठी खराडी येथील हॉटेल गौरव रेसिडेन्सीमध्ये खोली बुक केली होती. 27 ऑक्टोबर रोजी दुपारी सुमारे 12 वाजता तो हॉटेलमध्ये आला होता.
29 ऑक्टोबर रोजी चेक-आउटची वेळ होऊनही त्याने खोलीचा दरवाजा उघडला नाही. त्यामुळे हॉटेलमधील कर्मचाऱ्यांनी दरवाजा ठोठावला. मात्र, आतून कोणताही प्रतिसाद मिळाला नाही. त्यानंतर कर्मचाऱ्यांनी डुप्लिकेट चावीच्या मदतीने खोली उघडली असता अक्षय मृतावस्थेत आढळला. त्याच्या जवळ गावठी पिस्तूलही आढळून आले.
मित्रांना पाठवला होता शेवटचा मेसेज
या घटनेतील आणखी एक महत्त्वाची बाब समोर आली आहे. आत्महत्या करण्यापूर्वी अक्षयने आपल्या मित्रांना शेवटचा संदेश पाठवला होता. 'आपली ही शेवटची भेट, यानंतर पुढच्या जन्मी भेटू', अशा आशयाचा मेसेज त्याने मित्रांना पाठवल्याची माहिती आहे.
अक्षयचे लग्न जमत नव्हते. तसेच तो प्रेम करत असलेल्या तरुणीने दुसऱ्या व्यक्तीसोबत विवाह केल्याने तो निराश होता, असे प्राथमिक माहितीतून समोर आले आहे. याशिवाय आर्थिक अडचणींमुळेही तो मानसिक तणावात असल्याचे सांगितले जात आहे. या परिस्थितीतून त्याने टोकाचे पाऊल उचलले असावे, असा प्राथमिक अंदाज पोलिसांनी व्यक्त केला आहे.
खराडी पोलिसांकडून तपास सुरू
या प्रकरणी खराडी पोलीस ठाण्यात गुन्हा क्रमांक 380/2026 नुसार भारतीय शस्त्र अधिनियमाच्या कलम 3(25) तसेच महाराष्ट्र पोलीस कायद्याच्या कलम 37(1)(3) सह 135 अंतर्गत गुन्हा नोंदवण्यात आला आहे.
सहाय्यक पोलीस निरीक्षक मीरा लक्ष्मण चव्हाण यांनी याबाबत फिर्याद दिली आहे. खराडी पोलिसांकडून घटनेचा पुढील तपास सुरू असून, तरुणाकडे गावठी पिस्तूल कसे आले आणि त्यासंदर्भातील इतर बाबींची चौकशी केली जात आहे.