ना रोषणाई, ना जल्लोष! पवार कुटुंब यंदा दिवाळी साजरी करणार नाही; शरद पवार भावूक

पुणे : राज्यातील दुष्काळी परिस्थिती आणि शेतकऱ्यांच्या अडचणींचा आढावा घेण्यासाठी राष्ट्रवादी काँग्रेस (शरदचंद्र पवार) पक्षाचे अध्यक्ष शरद पवार यांनी दुष्काळी दौरा सुरू केला आहे. या दौऱ्यानिमित्त ते आज आणि उद्या सोलापूर जिल्ह्यातील विविध भागांना भेट देणार आहेत. यावेळी माध्यमांशी संवाद साधताना त्यांनी राज्यातील दुष्काळी परिस्थिती, शेतकऱ्यांना आवश्यक असलेली मदत, पाणीटंचाई, उजनीतील एआय डेटा सेंटर आणि दिल्लीतील इंडिया आघाडीच्या आंदोलनावर भाष्य केले. मात्र, यावेळी सर्वाधिक लक्ष वेधले ते त्यांच्या एका भावूक वक्तव्याने. दिवंगत अजित पवार यांच्या निधनामुळे यंदा पवार कुटुंबीय दिवाळी साजरी करणार नसल्याचे शरद पवार यांनी स्पष्ट केले.

'यंदा आमच्याकडे दिवाळी नाही'; शरद पवारांची भावूक प्रतिक्रिया

दिवंगत नेते अजित पवार यांच्या निधनानंतर पवार कुटुंबीयांसाठी यंदाची दिवाळी दुःखाची असणार आहे. यंदा आम्ही दिवाळी साजरी करणार नाही, असे शरद पवार यांनी सांगितले. अजित पवार यांच्या निधनानंतर पहिल्यांदाच त्यांच्याशिवाय दिवाळीचा सण येत असल्याने कुटुंबीयांमध्ये दुःखाचे वातावरण आहे. त्यामुळे यंदा पवार कुटुंबाकडून कोणताही सण साजरा केला जाणार नसल्याचे त्यांनी स्पष्ट केले.

सोलापूरमध्ये दुष्काळाची गंभीर परिस्थिती; 135 टँकरने पाणीपुरवठा

राज्यातील दुष्काळी परिस्थितीवर बोलताना शरद पवार म्हणाले की, आपण सध्या प्रत्यक्ष दुष्काळी भागात जाऊन परिस्थितीची माहिती घेत आहोत. आज माढा तालुक्यातील दुधाळी परिसराला भेट देणार असून, स्थानिक आमदारांकडून तेथील परिस्थिती समजून घेणार आहोत.

शेतकऱ्यांना सध्या पाणी आणि चाऱ्याची अत्यंत गरज आहे. सोलापूर जिल्ह्यातील 139 गावांमध्ये 135 टँकरद्वारे पाणीपुरवठा केला जात आहे. तर केवळ माढा तालुक्यात 110 टँकर सुरू आहेत. ही एका जिल्ह्यातील परिस्थिती असून, दुष्काळाचे गांभीर्य लक्षात घेण्याची गरज असल्याचे पवार यांनी सांगितले.

दुष्काळग्रस्त भागातील नागरिकांना प्रत्यक्ष भेटून त्यांच्या समस्या जाणून घेणार असून, आवश्यक मदत उपलब्ध करून देण्यासाठी प्रयत्न करणार असल्याचेही त्यांनी स्पष्ट केले.

शेतकऱ्यांच्या मदतीसाठी सरकारशी चर्चा; पवारांना मदतीची अपेक्षा

दुष्काळग्रस्त शेतकऱ्यांना मदत मिळावी यासाठी राज्य सरकारकडे पाठपुरावा करणार असल्याचे शरद पवार यांनी सांगितले. यापूर्वी दिल्लीमध्ये आणि मुख्यमंत्र्यांसोबतही बैठक झाली आहे. शेतकऱ्यांच्या मदतीसाठी काहीतरी मार्ग निघेल, अशी खात्री असल्याचे त्यांनी म्हटले.

राज्यात दुष्काळाचे सावट असताना शेतकऱ्यांना पाणी, चारा आणि इतर आवश्यक सुविधा उपलब्ध करून देणे गरजेचे असल्याचेही त्यांनी अधोरेखित केले.

ज्ञानेश कुमार यांच्या राजीनाम्याच्या मागणीवर केंद्राने निर्णय घ्यावा

दिल्लीमध्ये सुरू असलेल्या इंडिया आघाडीच्या आंदोलनावरही शरद पवार यांनी प्रतिक्रिया दिली. निवडणूक आयुक्त ज्ञानेश कुमार यांच्या राजीनाम्याच्या मागणीसंदर्भात केंद्र सरकारने तातडीने निर्णय घेण्याची आवश्यकता असल्याचे ते म्हणाले.

केंद्र सरकारने अद्याप निर्णय घेतलेला नसल्याने विरोधी पक्ष आज दिल्लीत एकत्र येणार आहेत. या आंदोलनात खासदार सुप्रिया सुळे आणि संजय राऊत सहभागी होणार असल्याचेही त्यांनी सांगितले.

मात्र, सध्या आपले प्राधान्य दुष्काळग्रस्त भागातील पाणी आणि चाऱ्याचा प्रश्न सोडवण्याला असल्याचे पवार यांनी स्पष्ट केले.

पुण्यातील धरणातील पाणी जपून वापरा; शरद पवारांचे आवाहन

पाणीटंचाईच्या प्रश्नावर बोलताना शरद पवार यांनी पुणेकरांनाही महत्त्वाचे आवाहन केले. पाण्याची मागणी दिवसेंदिवस वाढत असून, पिण्याच्या पाण्याचा प्रश्न गंभीर होऊ शकतो. त्यामुळे खडकवासला आणि इतर धरणांमधील पाण्याचा साठा काळजीपूर्वक वापरणे आवश्यक आहे.

आजपासून जून महिन्यापर्यंत पाण्याचे योग्य नियोजन करावे लागणार आहे. उपलब्ध पाणीसाठ्यावर लक्ष ठेवून पाण्याचा वापर जपून करणे गरजेचे असल्याचे त्यांनी सांगितले.

उजनीतील एआय डेटा सेंटरबाबत काय म्हणाले शरद पवार?

उजनी येथे प्रस्तावित एआय डेटा सेंटर प्रकल्पाला आमदार रोहित पवार यांच्यासह राष्ट्रवादी काँग्रेसच्या काही आमदारांनी विरोध दर्शवला आहे. या प्रकल्पामुळे पाण्याच्या वापरावर परिणाम होण्याची भीती व्यक्त केली जात आहे. याबाबत शरद पवार यांना विचारले असता त्यांनी सावध भूमिका मांडली.

'एआय आलं म्हणजे पाणी गेलं असं नव्हे, पाणी जपून वापरलं पाहिजे एवढेच,' असे पवार म्हणाले. आपण स्वतः उजनी परिसरात जाऊन स्थानिक नागरिकांची मते जाणून घेणार आहोत. काही दुरुस्ती करण्याची आवश्यकता असल्यास त्याबाबत योग्य निर्णय घेऊ, असेही त्यांनी स्पष्ट केले.

दुष्काळी दौऱ्यातून शेतकऱ्यांच्या प्रश्नांना वाचा फोडणार

राज्यात दुष्काळी परिस्थिती निर्माण झाल्याने शेतकरी आणि ग्रामीण भागातील नागरिकांसमोर पाणी, चारा आणि रोजगाराचे प्रश्न निर्माण झाले आहेत. या पार्श्वभूमीवर शरद पवार यांचा सोलापूर जिल्ह्यातील दौरा महत्त्वाचा मानला जात आहे. प्रत्यक्ष शेतकऱ्यांशी संवाद साधून त्यांच्या अडचणी जाणून घेणे आणि सरकारकडून मदत मिळवण्यासाठी पाठपुरावा करणे, हा या दौऱ्याचा मुख्य उद्देश असल्याचे त्यांच्या वक्तव्यावरून स्पष्ट होते.

एकीकडे दुष्काळग्रस्त शेतकऱ्यांच्या मदतीसाठी राजकीय पातळीवर प्रयत्न सुरू असताना दुसरीकडे अजित पवार यांच्या निधनानंतरची पहिली दिवाळी पवार कुटुंबीयांसाठी भावनिक ठरणार आहे.