कुकरच्या 10 शिट्ट्यांनंतरही वाटाणा शिजेना, आता रायगडमध्ये अमृत आहारावर गंभीर आरोप; तक्रार करणाऱ्या मदतनीसाचा राजीनामा, नेमकं काय घडलं?

रायगड : काही दिवसांपूर्वी पुणे जिल्ह्यातील अंगणवाडीतील आहाराचा मुद्दा एका व्हायरल व्हिडिओमुळे चर्चेत आला होता. आता रायगड जिल्ह्यातील कर्जत तालुक्यातून अंगणवाडीतील आहाराबाबत गंभीर आरोप समोर आले आहेत. कर्जत तालुक्यातील दुर्गम भागात असलेल्या वरची भागुची वाडी अंगणवाडीतील चिमुकल्यांना आणि गरोदर मातांना दिल्या जाणाऱ्या अमृत आहाराच्या गुणवत्तेवर प्रश्नचिन्ह उपस्थित करण्यात आले आहे.

विशेष म्हणजे, या कथित अनियमिततेबाबत वरिष्ठ अधिकाऱ्यांकडे तक्रार करणाऱ्या अंगणवाडी मदतनीस महिलेने मानसिक छळाला कंटाळून राजीनामा दिल्याचा दावा केला आहे. त्यामुळे या प्रकरणात नेमकी वस्तुस्थिती काय आणि अंगणवाडीतील आहाराच्या गुणवत्तेवर देखरेख कोणाची, असा सवाल उपस्थित होत आहे.

वरिष्ठांकडे तक्रार, गंभीर आरोप काय?

वरची भागुची वाडी अंगणवाडीत मदतनीस म्हणून कार्यरत असलेल्या उर्मिला पारधी यांनी प्रकल्प अधिकारी तसेच गटविकास अधिकारी, एकात्मिक बाल विकास सेवा योजना, कर्जत आणि अलिबाग कार्यालयाकडे तक्रारी केल्याचे समोर आले आहे.

या तक्रारीमध्ये अंगणवाडी सेविका बीजी निरगुडा यांच्यावर आहाराच्या वितरणासंदर्भात गंभीर आरोप करण्यात आले आहेत.

पारधी यांच्या तक्रारीनुसार, गरोदर मातांना दिल्या जाणाऱ्या अमृत आहारामध्ये अनियमितता होत असल्याचा आरोप आहे. काही लाभार्थ्यांच्या नावावर आहाराचे वितरण दाखवले जात असले, तरी प्रत्यक्षात संबंधित लाभार्थ्यांना आहार मिळत नसल्याचा दावाही करण्यात आला आहे.

सडलेली डाळ, खराब केळी अन् साखरेत उंदराची विष्ठा?

तक्रारीतील आरोपांनुसार, अंगणवाडीत वितरित करण्यात येणारी डाळ सडलेली आणि कीड लागलेली असल्याचे आढळून आले. याशिवाय साखरेमध्ये उंदराची विष्ठा आढळूनही ती वापरल्याचा आरोप करण्यात आला आहे.

चिमुकल्यांना आहारामध्ये दिली जाणारी केळीही खराब दर्जाची असल्याचा दावा करण्यात आला आहे. निकृष्ट किंवा खराब अन्नपदार्थांची छायाचित्रे पुरावा म्हणून वरिष्ठ अधिकाऱ्यांकडे सादर केल्याचेही तक्रारदार महिलेचे म्हणणे आहे.

या आरोपांमुळे अंगणवाडीत चिमुकल्यांना आणि गरोदर महिलांना दिल्या जाणाऱ्या आहाराच्या गुणवत्तेवर गंभीर प्रश्न निर्माण झाले आहेत.

आधार कार्ड नसल्याने आहार नाकारला?

तक्रारीमध्ये आणखी एक गंभीर आरोप करण्यात आला आहे. गावातील एका गरोदर महिलेचे आधार कार्ड नसल्याचे कारण देत तिला आहार देण्यात आला नाही. मात्र, तिच्या नावावर आहाराचे वितरण झाल्याचे दाखवण्यात आल्याचा आरोप उर्मिला पारधी यांनी केला आहे.

जर हा आरोप चौकशीत सिद्ध झाला, तर लाभार्थ्यांच्या नावे आहार वितरणाची नोंद आणि प्रत्यक्ष वितरण यामध्ये तफावत असल्याचा मुद्दा गंभीर ठरू शकतो.

तक्रार केल्यानंतर मानसिक छळाचा आरोप

दरम्यान, या कथित अनियमिततेची माहिती वरिष्ठ अधिकाऱ्यांना दिल्यानंतर आपल्याला आणि आपल्या कुटुंबीयांना शिवीगाळ, अपमानास्पद वागणूक आणि मानसिक त्रासाला सामोरे जावे लागल्याचा आरोप उर्मिला पारधी यांनी केला आहे.

सततच्या या त्रासामुळे आपण अंगणवाडी मदतनीस पदाचा राजीनामा दिल्याचे त्यांनी सांगितले.

त्यामुळे आता केवळ आहाराच्या गुणवत्तेचाच नाही, तर तक्रार करणाऱ्या कर्मचाऱ्याला मानसिक त्रास देण्यात आला का? या प्रश्नाचाही तपास होण्याची गरज निर्माण झाली आहे.

पुण्यातील वाटाण्याच्या व्हिडिओनंतर आता रायगडमध्येही खळबळ

काही काळापूर्वी पुणे जिल्ह्यातील एका अंगणवाडी सेविकेने व्हिडिओच्या माध्यमातून आहाराच्या गुणवत्तेचा मुद्दा उपस्थित केला होता. कुकरला तब्बल 10 शिट्ट्या होऊनही वाटाणा शिजत नसल्याचे या व्हिडिओमध्ये दाखवण्यात आले होते.

हा व्हिडिओ सोशल मीडियावर मोठ्या प्रमाणात व्हायरल झाल्यानंतर संबंधित अंगणवाडी सेविकेवर प्रशासनाकडून कारवाई करण्यात आली होती. मात्र, त्यानंतर सोशल मीडियावरील चर्चेमुळे ही कारवाई थांबवण्यात आल्याचे वृत्त समोर आले होते.

आता रायगडमधील प्रकरणातही आहाराबाबत प्रश्न उपस्थित करणाऱ्या मदतनीसाने राजीनामा दिल्याने अंगणवाडी व्यवस्थेतील तक्रारी हाताळण्याच्या पद्धतीवर प्रश्न उपस्थित होत आहेत.

प्रशासन चौकशी करणार का?

कर्जत तालुक्यातील या प्रकरणातील आरोपांची अधिकृत चौकशी होऊन वस्तुस्थिती समोर येणे महत्त्वाचे आहे. आहाराची गुणवत्ता, लाभार्थ्यांना प्रत्यक्ष वितरण, नोंदी आणि तक्रारदार महिलेने सादर केलेले पुरावे यांची तपासणी झाल्यास या प्रकरणातील सत्य स्पष्ट होऊ शकते.

चिमुकले आणि गरोदर माता यांच्यासाठी दिला जाणारा आहार त्यांच्या पोषणाशी थेट संबंधित असल्याने या प्रकरणाची निष्पक्ष चौकशी करून दोषी आढळणाऱ्यांवर कारवाई करावी, अशी मागणी जोर धरत आहे.

दरम्यान, या आरोपांबाबत संबंधित अंगणवाडी सेविका आणि प्रशासनाची अधिकृत भूमिका समोर आल्यानंतरच संपूर्ण चित्र स्पष्ट होणार आहे.