संगमनेरमध्ये FDAची धडक कारवाई; पाकिस्तानी बनावटीच्या 'गोरी क्रीम'चा साठा जप्त

अहिल्यानगर: अन्न व औषध प्रशासन (FDA) आणि संगमनेर शहर पोलिसांनी संयुक्त कारवाई करत संगमनेर येथील गोल्डन मार्केटमधील एका दुकानातून पाकिस्तानी बनावटीच्या सौंदर्यप्रसाधनांचा साठा जप्त केला आहे. या कारवाईत 12 हजार 900 रुपयांचा मुद्देमाल जप्त करण्यात आला असून, संबंधित दुकानाविरोधात पुढील कायदेशीर कारवाई सुरू करण्यात आली आहे.

अन्न व औषध प्रशासनाच्या माहितीनुसार, शनिवारी (1 ऑगस्ट) गुप्त माहितीच्या आधारे संगमनेर शहर पोलिसांच्या मदतीने गोल्डन मार्केट परिसरातील संबंधित दुकानावर छापा टाकण्यात आला. तपासणीदरम्यान पाकिस्तानात उत्पादित करण्यात आलेली 'गोरी ब्युटी क्रीम' तसेच 'गोरी डे अँड नाईट क्रीम' ही सौंदर्यप्रसाधने विक्रीसाठी ठेवण्यात आल्याचे आढळून आले. त्यानंतर अधिकाऱ्यांनी तात्काळ संबंधित उत्पादनांचा साठा जप्त केला.

कारवाईदरम्यान विक्रीसाठी ठेवलेल्या उत्पादनांबाबतची कागदपत्रे, परवानग्या आणि खरेदी-विक्रीची नोंदही तपासण्यात आली. या प्रकरणात संबंधित व्यक्तींकडून आवश्यक कागदपत्रांची मागणी करण्यात आली असून, अन्न व औषध प्रशासनाकडून लागू कायद्यानुसार पुढील तपास सुरू आहे.

अन्न व औषध प्रशासनाचे आयुक्त तुकाराम मुंढे यांच्या निर्देशानुसार राज्यभर भेसळयुक्त, निकृष्ट दर्जाची आणि नियमबाह्य औषधे, सौंदर्यप्रसाधने तसेच खाद्यपदार्थांविरोधात विशेष तपासणी मोहीम राबविण्यात येत आहे. या मोहिमेअंतर्गत हॉटेल, दूध डेअरी, मिठाई उत्पादक, खाद्यपदार्थ निर्मिती उद्योग तसेच औषधे आणि सौंदर्यप्रसाधने विक्री करणाऱ्या आस्थापनांची तपासणी करण्यात येत आहे.

संगमनेरमधील या कारवाईमुळे परिसरातील व्यापाऱ्यांमध्ये खळबळ उडाली असून, नियमांचे उल्लंघन करून सौंदर्यप्रसाधने किंवा इतर उत्पादने विक्री करणाऱ्यांविरोधात भविष्यातही कठोर कारवाई सुरू राहणार असल्याचा इशारा अन्न व औषध प्रशासनाने दिला आहे. नागरिकांनी अधिकृत परवानाधारक विक्रेत्यांकडूनच औषधे आणि सौंदर्यप्रसाधने खरेदी करावीत, असे आवाहनही प्रशासनाने केले आहे.