NEET पेपरफुटीविरोधात महाराष्ट्रभर विद्यार्थ्यांचे आंदोलन

दिल्लीतील जंतर-मंतर येथे NEET पेपरफुटी आणि परीक्षा घोटाळ्याच्या विरोधात शांततापूर्ण आंदोलन करणाऱ्या विद्यार्थ्यांवर दिल्ली पोलिसांनी केलेल्या कथित लाठीमाराचे पडसाद आता महाराष्ट्रभर उमटू लागले आहेत. या घटनेच्या निषेधार्थ राज्यातील विविध विद्यार्थी संघटना, तरुण आणि अनेक राजकीय पक्षांनी आंदोलन सुरू केले आहे. केंद्रीय शिक्षण मंत्री धर्मेंद्र प्रधान यांनी तातडीने राजीनामा द्यावा आणि पेपरफुटी प्रकरणातील दोषींवर कठोर कारवाई करावी, अशी मागणी आंदोलनकर्त्यांनी केली.

पुण्यात तिरंगा पदयात्रा

पुण्यात CJP आणि विविध विद्यार्थी संघटनांच्या संयुक्त विद्यमाने मोठ्या प्रमाणावर तिरंगा पदयात्रा काढण्यात आली. लाल महाल चौक (शनिवार वाडा) ते जिल्हाधिकारी कार्यालयापर्यंत हजारो विद्यार्थी हातात तिरंगा घेऊन रस्त्यावर उतरले. मुसळधार पावसातही विद्यार्थ्यांचा उत्साह कमी झाला नाही.

आंदोलनादरम्यान विद्यार्थ्यांनी "पेपर नाही, सिस्टीम लीक झाली आहे" असे फलक हातात घेत सरकारविरोधात निषेध व्यक्त केला. रॅप गाणी, विडंबनात्मक पोस्टर्स आणि वेगळ्या पद्धतीच्या घोषणांमुळे हे आंदोलन चर्चेचा विषय ठरले. विद्यार्थ्यांसोबत पालक, प्राध्यापक, ज्येष्ठ नागरिक आणि तृतीयपंथी समुदायानेही सहभाग घेतला. जिल्हाधिकारी कार्यालयासमोर ठिय्या आंदोलन करत शिक्षण मंत्र्यांच्या राजीनाम्याची मागणी करण्यात आली.

मुंबईत तिरंगा मार्च

मुंबईतील शिवाजी पार्क येथे शिवसेना (ठाकरे गट) आणि मनसेच्या वतीने तिरंगा मार्च काढण्यात आला. या मोर्चात कोणत्याही राजकीय पक्षाचा झेंडा न वापरता केवळ राष्ट्रध्वज हातात घेऊन हजारो तरुण सहभागी झाले.

विद्यार्थ्यांच्या प्रश्नावर आदित्य ठाकरे आणि अमित ठाकरे प्रथमच एकाच मंचावर दिसले. उद्धव ठाकरे यांनी केंद्र सरकारवर टीका करत विद्यार्थ्यांच्या आंदोलनाला पाठिंबा दर्शवला. तर अमित ठाकरे यांनी दिल्लीतील विद्यार्थी आंदोलकांवरील पोलीस कारवाई मागे घेण्याची मागणी केली आणि विद्यार्थ्यांना न्याय मिळाला पाहिजे, असे सांगितले.

राज्यभर आंदोलनाची तीव्रता वाढली

दिल्लीतील घटनेचे पडसाद नागपूर, नाशिक, छत्रपती संभाजीनगरसह राज्यातील अनेक शहरांमध्ये उमटले. नागपूरमध्ये विद्यार्थी संघटनांनी केंद्र सरकारविरोधात निदर्शने केली. नाशिकमध्ये विद्यार्थ्यांनी कॅन्डल मार्च काढून दिल्लीतील जखमी विद्यार्थ्यांप्रती ऐक्य व्यक्त केले. छत्रपती संभाजीनगरातील क्रांती चौकातही मोठ्या संख्येने विद्यार्थी आणि विविध सामाजिक व राजकीय संघटनांचे कार्यकर्ते एकत्र आले आणि आंदोलनाला पाठिंबा दिला.

विद्यार्थ्यांची स्पष्ट भूमिका

आंदोलनकर्त्यांचे म्हणणे आहे की, वारंवार होणाऱ्या पेपरफुटीमुळे लाखो विद्यार्थ्यांच्या मेहनतीवर पाणी फिरत आहे. अनेक विद्यार्थी वर्षानुवर्षे अभ्यास करून स्पर्धा परीक्षांची तयारी करतात, मात्र अशा घोटाळ्यांमुळे त्यांच्या भविष्यावर प्रश्नचिन्ह निर्माण होते. त्यामुळे पेपरफुटीच्या सर्व प्रकरणांची निष्पक्ष चौकशी करून दोषींवर कठोर कारवाई करावी, परीक्षा व्यवस्था अधिक सुरक्षित आणि पारदर्शक करावी तसेच विद्यार्थ्यांचा विश्वास पुन्हा मिळवण्यासाठी ठोस पावले उचलावीत, अशी मागणी करण्यात आली.

दिल्लीतील घटनेनंतर हा मुद्दा आता केवळ राजधानीपुरता मर्यादित राहिलेला नसून देशभरातील विद्यार्थ्यांचा प्रश्न बनला आहे. महाराष्ट्रासह अनेक राज्यांमध्ये सुरू असलेल्या आंदोलनांमुळे केंद्र सरकारवरील दबाव वाढत असून, या प्रकरणात पुढे काय निर्णय घेतला जातो याकडे विद्यार्थी, पालक आणि संपूर्ण देशाचे लक्ष लागले आहे.