सत्तरीचा टप्पा पार, मग निवृत्ती कधी? अंधारेंचा मोदींना खोचक सवाल

मुंबई : शिवसेना ठाकरे गटाच्या उपनेत्या सुषमा अंधारे यांनी विविध राजकीय मुद्द्यांवरून भाजप आणि केंद्र सरकारवर जोरदार टीका केली आहे. झेन जी आंदोलन, पंतप्रधान नरेंद्र मोदी, सरसंघचालक मोहन भागवत तसेच राज्यातील मराठा आरक्षणाच्या मुद्द्यावरून त्यांनी सत्ताधाऱ्यांना लक्ष्य केलं.

भाजपचे काही नेते झेन जी आंदोलनाला परदेशातून फंडिंग होत असल्याचं सांगत आहेत. मात्र, दुसरीकडे सरसंघचालक मोहन भागवत झेन जींच्या मताशी सहमत असल्याचं दिसत असल्याचं सुषमा अंधारे म्हणाल्या. झेन जींनी नरेंद्र मोदी आणि अमित शाह यांच्याबाबत जी भूमिका मांडली आहे, त्या भूमिकेशी मोहन भागवत सहमत असल्याचं वाटतं, असा दावा त्यांनी केला.

अशा परिस्थितीत आंदोलन हाताळता येत नसेल तर पंतप्रधान नरेंद्र मोदी यांनी राजीनामा द्यायला हवा, अशी टीका अंधारे यांनी केली. भाजपकडून आंदोलनाबाबत वेगवेगळ्या भूमिका मांडल्या जात असल्याचं सांगत भाजपने नेमकं खरं कोणतं हे ठरवावं, असंही त्या म्हणाल्या.

याचवेळी अंधारे यांनी मोहन भागवतांच्या जुन्या वक्तव्याची आठवण करून देत नरेंद्र मोदींवर टोला लगावला. मोहन भागवत यांनी सत्तरीनंतर निवृत्तीची शाल पांघरली पाहिजे, असं सांगितलं होतं. मात्र, नरेंद्र मोदी यांनी सत्तरी ओलांडली आहे, असं म्हणत अंधारे यांनी खोचक टिप्पणी केली.

नवनाथ बन यांच्यासारख्या व्यक्तीवर आपण बोलणार नसल्याचं म्हणत अंधारे यांनी त्यांच्यावरही टीका केली. भाजपने नेमकी आपली भूमिका काय आहे, हे स्पष्ट करावं, असं त्या म्हणाल्या.

विजय चौधरी ऑडिओ क्लिप प्रकरणावरही अंधारेंची टीका

विजय चौधरी प्रकरणातील ऑडिओ क्लिपवरही सुषमा अंधारे यांनी प्रतिक्रिया दिली. विजय चौधरी महामंत्री राहिले असून सध्या फरार असल्याचा दावा त्यांनी केला. या प्रकरणातील ऑडिओ क्लिप व्हायरल झाल्या असून त्यातून एका पीएला अटक झाल्याचंही अंधारे म्हणाल्या.

या प्रकरणात तब्बल 7,500 ऑडिओ असल्याचा दावा करत त्यातील एक-एक ऑडिओ समोर येत असल्याचं त्यांनी सांगितलं. ‘ना खाऊंगा, ना खाने दूंगा’ अशी भूमिका मांडणारे भाजप नेते आणि मंत्रीच टक्केवारीवर काम करत असल्याचा आरोपही अंधारे यांनी केला.

फडणवीस-शिंदेंच्या राजकारणात मराठा समाजाचं नुकसान : अंधारे

मनोज जरांगे पाटील यांच्या दौऱ्याच्या पार्श्वभूमीवरही सुषमा अंधारे यांनी राज्यातील राजकारणावर भाष्य केलं. एकनाथ शिंदे यांना ‘मराठा मेन’ होण्याची घाई आहे. मात्र, या घाईगडबडीत ठोस आणि वैध कागदपत्रांची पूर्तता करण्यात आली नाही, असा आरोप त्यांनी केला.

ओबीसी आणि मराठा समाजातील वाद कायम राहावा, यासाठी जाणीवपूर्वक प्रयत्न केले जात असल्याचा आरोप अंधारे यांनी केला. देवेंद्र फडणवीस यांनी हा वाद सुरू ठेवल्याची टीकाही त्यांनी केली. फडणवीस आणि एकनाथ शिंदे यांच्या राजकीय कुरबुरीत मराठा समाजाचं नुकसान होत असल्याचं त्या म्हणाल्या.

भाजपला आंदोलन हाताळता येत नाही, तर भाजप आंदोलन मोडीत काढण्याचं काम करत असल्याची टीकाही अंधारे यांनी केली.

भाजपमध्ये जुन्या-नव्यांचा संघर्ष?

भाजपमध्ये सध्या जुने विरुद्ध नवे असा संघर्ष सुरू असल्याचा दावा सुषमा अंधारे यांनी केला. नवे नेते येऊन आयत्या पिठावर रेघोट्या मारत आहेत, तर जुन्या नेत्यांच्या तोंडाला पान पुसण्याचं काम सुरू असल्याची टीका त्यांनी केली.

जयकुमार गोरे यांच्याविरोधात आगामी पत्रकार परिषदेत आपण बोलणार असल्याचंही अंधारे यांनी सांगितलं. जयकुमार गोरे यांच्याबाबत आपल्याला अनेक गोष्टी माहिती असून फलटणमधील त्यांचं प्रकरण तसेच इतर कथित कारणामेही माहिती असल्याचा दावा त्यांनी केला.

‘एकनाथ शिंदेंना मार्केटिंग चांगलं जमतं’

एकनाथ शिंदे यांच्या राजकारणावरही सुषमा अंधारे यांनी मिश्कील टिप्पणी केली. एकनाथ शिंदे यांना मार्केटिंग चांगलं जमतं, तर उद्धव ठाकरेंना मार्केटिंग जमलं नाही, असं त्या म्हणाल्या.

‘एकनाथ शिंदे साहेब चालता चालता विमान थांबवून मार्केटिंग करू शकतात,’ असा टोला अंधारे यांनी लगावला.

दरम्यान, नाशिक कुंभमेळ्यातील कंत्राटांवरूनही त्यांनी राज्य सरकारला लक्ष्य केलं. नाशिक कुंभमेळ्यातील सर्व कंत्राट गुजरातमधील ठेकेदारांना दिल्याचा दावा करत महाराष्ट्रात कुंभमेळा होत असताना महाराष्ट्रातील ठेकेदारांना कंत्राटं देण्यात काय हरकत आहे, असा सवाल त्यांनी केला.

भाजपचे ‘संकटमोचक’ म्हणून ओळखले जाणारे गिरीश महाजन हे सध्या गुजरातच्या ठेकेदारांचे ‘कॉन्ट्रॅक्ट मोचक’ आहेत का?, असा खोचक सवालही सुषमा अंधारे यांनी केला.