उद्धव ठाकरे आणि एकनाथ शिंदेंना कल्याण कोर्टाचे समन्स; 2009 च्या निवडणूक प्रकरणाची पुन्हा सुनावणी

मुंबई : शिवसेना (उद्धव बाळासाहेब ठाकरे) पक्षाचे प्रमुख आणि राज्याचे माजी मुख्यमंत्री उद्धव ठाकरे यांना कल्याण न्यायालयाने समन्स बजावले आहे. न्यायालयाने त्यांना 5 ऑगस्ट रोजी न्यायालयात हजर राहण्याचे आदेश दिले आहेत. 2009 च्या लोकसभा निवडणुकीतील एका प्रकरणात ही कारवाई करण्यात आली असून, अनेक वर्षांनंतर हे प्रकरण पुन्हा चर्चेत आले आहे.

याच प्रकरणात राज्याचे उपमुख्यमंत्री एकनाथ शिंदे यांनाही 6 ऑगस्ट रोजी कल्याण न्यायालयात उपस्थित राहण्याचे आदेश देण्यात आल्याची माहिती आहे. त्यामुळे दोन्ही प्रमुख नेत्यांच्या कोर्टातील उपस्थितीकडे राजकीय वर्तुळाचे लक्ष लागले आहे.

नेमकं प्रकरण काय?

2009 च्या लोकसभा निवडणुकीत कल्याण मतदारसंघात वसंत डावखरे आणि आनंद परांजपे यांच्यात निवडणूक झाली होती. प्रचारादरम्यान डोंबिवली येथे झालेल्या सभेत उद्धव ठाकरे यांनी वसंत डावखरे यांचा एक व्हिडिओ दाखवला होता.

या व्हिडिओमध्ये डावखरे कार्यकर्त्यांना निवडणूक जिंकण्यासाठी पोलिस आणि निवडणूक अधिकाऱ्यांची भीती न बाळगण्याचे आवाहन करत असल्याचा दावा करण्यात आला होता. मात्र, वसंत डावखरे यांनी हा व्हिडिओ संपादित करून आपली बदनामी करण्यात आल्याचा आरोप केला. तसेच व्हिडिओतील मजकूर चुकीच्या पद्धतीने सादर करण्यात आल्याचेही त्यांनी म्हटले होते.

यानंतर वसंत डावखरे यांनी उद्धव ठाकरे, एकनाथ शिंदे, आनंद परांजपे आणि रमाकांत देवळेकर यांच्याविरोधात न्यायालयात खटला दाखल केला. दुसरीकडे, त्यावेळच्या शिवसेनेकडून हा व्हिडिओ खरा असल्याचा दावा करण्यात आला होता.

पुढे काय होणार?

या प्रकरणाची सुनावणी सध्या कल्याण न्यायालयात सुरू आहे. न्यायालयाने उद्धव ठाकरे आणि एकनाथ शिंदे यांना समन्स बजावल्यामुळे तब्बल 17 वर्षांपूर्वीचे हे प्रकरण पुन्हा एकदा चर्चेत आले आहे. आता दोन्ही नेते स्वतः न्यायालयात हजर राहणार की त्यांच्या वतीने वकील बाजू मांडणार, याकडे सर्वांचे लक्ष लागले आहे. आगामी सुनावणीत या प्रकरणात नेमकी कोणती भूमिका मांडली जाते, याकडे राजकीय आणि कायदेविषयक वर्तुळाचे लक्ष असेल.