परफ्युम खरेदीस नकार दिल्याने तरुणीशी गैरवर्तन; कल्याणमध्ये फेरीवाल्यांविरोधात संताप

कल्याण : दिवाळीचा सण अवघ्या काही दिवसांवर आल्याने सर्वत्र खरेदीची लगबग सुरू आहे. बाजारपेठांमध्ये नागरिकांची मोठी गर्दी पाहायला मिळत असून कपडे, मिठाई आणि विविध वस्तूंच्या खरेदीसाठी ग्राहकांची धावपळ सुरू आहे. मात्र, याच सणासुदीच्या काळात कल्याण रेल्वे स्थानक परिसरातून एक धक्कादायक घटना समोर आली आहे. परफ्युम खरेदी करण्यास नकार दिल्याने फेरीवाल्यांनी एका तरुणीला आणि तिच्या मित्राला भररस्त्यात बेदम मारहाण केल्याचा आरोप आहे. या घटनेमुळे रेल्वे स्थानक परिसरातील फेरीवाल्यांच्या दादागिरीचा मुद्दा पुन्हा एकदा ऐरणीवर आला आहे.

परफ्युम खरेदी न केल्याने तरुण-तरुणीला मारहाण

मिळालेल्या माहितीनुसार, कल्याण रेल्वे स्थानक परिसरात एक तरुण आणि तरुणी परफ्युम खरेदी करण्यासाठी गेले होते. यावेळी परफ्युम खरेदी न केल्याच्या कारणावरून फेरीवाल्यांनी दोघांशी वाद घातला. या वादाचे रूपांतर पुढे मारहाणीत झाले. फेरीवाल्यांनी तरुणी आणि तिच्या मित्राला भररस्त्यात मारहाण केल्याचा आरोप करण्यात आला आहे.

या प्रकारादरम्यान तरुणीचा टी-शर्ट फाडण्यात आला, तसेच तिला अश्लील शिवीगाळ करण्यात आल्याचेही समोर आले आहे. रेल्वे स्थानक परिसरात घडलेल्या या प्रकारामुळे प्रवासी आणि नागरिकांमध्ये संतापाचे वातावरण निर्माण झाले आहे. ऐन दिवाळीच्या खरेदीच्या काळात ग्राहकांनाच अशा प्रकारच्या त्रासाला सामोरे जावे लागत असल्याने फेरीवाल्यांच्या मुजोरीवर कारवाई करण्याची मागणी होत आहे.

बजरंग दलाच्या हस्तक्षेपानंतर पोलिसांची कारवाई

या घटनेप्रकरणी कल्याणमधील महात्मा फुले पोलीस ठाण्यात गुन्हा दाखल करण्यात आला आहे. सुरुवातीला तक्रार दाखल करण्यासाठी तरुणीला तब्बल पाच तास पोलीस ठाण्यात थांबावे लागल्याचा आरोप करण्यात आला आहे. या प्रकारानंतर सकल हिंदू समाज आणि बजरंग दलाने आक्रमक भूमिका घेतली.

बजरंग दलाने या प्रकरणात पुढाकार घेतल्यानंतर पोलिसांनी आरोपींविरोधात कारवाई करत त्यांना अटक केली आहे. या प्रकरणाचा पुढील तपास महात्मा फुले पोलीस करत आहेत.

फेरीवाल्यांच्या दादागिरीवर कारवाई होणार का?

दरम्यान, महापौरांनी कारवाईचे आदेश दिल्यानंतरही रेल्वे स्थानक परिसरातील फुटपाथ आणि इतर सार्वजनिक ठिकाणी फेरीवाले कायम असल्याचे चित्र दिसत आहे. त्यामुळे अनधिकृत फेरीवाल्यांवर नेमकी कारवाई कधी होणार, असा सवाल नागरिकांकडून उपस्थित केला जात आहे.

या घटनेनंतर बजरंग दलाने प्रशासनाला इशारा देत संबंधित फेरीवाल्यांवर कठोर कारवाई करण्याची मागणी केली आहे. अन्यथा रस्त्यावर उतरून आंदोलन करण्याचा इशाराही देण्यात आला आहे.

दिवाळीच्या पार्श्वभूमीवर बाजारपेठांमध्ये वाढणारी गर्दी आणि रेल्वे स्थानक परिसरातील फेरीवाल्यांचा प्रश्न पाहता नागरिकांच्या सुरक्षिततेचा मुद्दा पुन्हा एकदा चर्चेत आला आहे. त्यामुळे पोलिसांसह महापालिका प्रशासन या प्रकरणी पुढे काय भूमिका घेते, याकडे सर्वांचे लक्ष लागले आहे.