महाराष्ट्रातील न्यायालयांना धमकीचे ई-मेल; ठाणे, सांगली, सोलापूरसह अनेक जिल्ह्यांत खळबळ

मुंबई : महाराष्ट्रातील अनेक जिल्हा न्यायालयांना बॉम्बस्फोट घडवून आणण्याची धमकी देणारे ई-मेल प्राप्त झाल्याने राज्यभरात मोठी खळबळ उडाली आहे. ठाणे, सांगली, सोलापूर, सातारा, बीड, परभणी आणि हिंगोलीसह राज्यातील विविध जिल्ह्यांमधील न्यायालयांना धमकीचे ई-मेल आल्याची माहिती समोर आली आहे. या पार्श्वभूमीवर पोलीस प्रशासन सतर्क झाले असून खबरदारीचा उपाय म्हणून अनेक न्यायालयांच्या इमारती तातडीने रिकाम्या करण्यात आल्या आहेत. बॉम्बशोधक व नाशक पथक, श्वान पथक आणि स्थानिक पोलिसांकडून न्यायालय परिसराची कसून तपासणी सुरू आहे.

ठाणे जिल्हा न्यायालयाला आयईडी बॉम्बस्फोटाची धमकी

ठाणे जिल्हा न्यायालयात आयईडी बॉम्बस्फोट घडवण्याची धमकी ई-मेलद्वारे देण्यात आली आहे. 27 नोव्हेंबरपर्यंत न्यायालयात स्फोट घडवण्याचा उल्लेख या ई-मेलमध्ये करण्यात आल्याची माहिती आहे. तसेच मेट्रो स्थानकांवर रात्री 9 वाजून 11 मिनिटांनी बॉम्बस्फोट घडवण्याची धमकीही देण्यात आल्याचे समोर आले आहे.

या ई-मेलमध्ये 1984 मधील रक्तपाताचा बदला रक्ताने घेण्याचा उल्लेख करण्यात आला आहे. तसेच प्रसिद्ध गायक दिलजीत दोसांझ यांचा साथीदार असल्याचा दावा करत 27 नोव्हेंबर रोजी महालक्ष्मी रेसकोर्स येथे होणाऱ्या कार्यक्रमात आयफोनमध्ये आयईडी ठेवून स्फोट घडवण्याची धमकी देण्यात आल्याचे वृत्त आहे.

ठाणे न्यायालयातील दोन्ही इमारती रिकाम्या

ठाणे परिमंडळ 1 चे पोलीस उपायुक्त बाळासाहेब पाटील यांनी दिलेल्या माहितीनुसार, न्यायालयाच्या रजिस्ट्रार कार्यालयाच्या अधिकृत ई-मेल आयडीवर सकाळी 9 वाजून 43 मिनिटांनी बॉम्ब ठेवल्याचा संदेश प्राप्त झाला. दुपारी 3 वाजून 11 मिनिटांनी स्फोट होणार असल्याचा उल्लेख या पंजाबी भाषेतील ई-मेलमध्ये होता.

धमकीचा संदेश प्राप्त होताच मानक कार्यपद्धतीनुसार न्यायालयाच्या दोन्ही इमारती तातडीने रिकाम्या करण्यात आल्या. न्यायाधीश, वकील, कर्मचारी आणि पक्षकारांना सुरक्षित ठिकाणी हलवण्यात आले. इमारतींपासून सुमारे 100 मीटर अंतरावर सुरक्षित परिसर निश्चित करण्यात आला.

बॉम्ब शोधक व नाशक पथकाकडून दोन्ही इमारतींचे आठही मजले, पार्किंग क्षेत्र, कँटीन आणि इतर परिसराची तपासणी करण्यात येत आहे. गुन्हे शाखा आणि सायबर सेलचे अधिकारीही या प्रकरणाचा तपास करत आहेत.

सांगली जिल्हा न्यायालयालाही धमकीचा ई-मेल

सांगली जिल्हा व सत्र न्यायालयालाही बॉम्ब ठेवल्याचा धमकीचा ई-मेल प्राप्त झाला आहे. ई-मेलमध्ये न्यायालयाची इमारत बॉम्बने उडवून देण्याची धमकी देण्यात आल्याने पोलीस प्रशासनाने तातडीने सुरक्षा व्यवस्था वाढवली.

सांगली जिल्हा पोलीस दलाचे अधिकारी, बॉम्बशोधक पथक आणि श्वान पथक न्यायालय परिसरात दाखल झाले. खबरदारी म्हणून न्यायाधीश, वकील आणि पक्षकारांना न्यायालयाच्या इमारतीबाहेर काढण्यात आले. प्राप्त ई-मेलमध्ये दुपारी 3 वाजून 11 मिनिटांनी स्फोट घडवण्याचा उल्लेख असल्याची माहिती आहे.

सोलापूर न्यायालय परिसरही निर्मनुष्य

सांगली आणि साताऱ्यानंतर सोलापूर जिल्हा व सत्र न्यायालयालाही बॉम्बस्फोटाची धमकी देणारा ई-मेल प्राप्त झाला. ई-मेल मिळताच वरिष्ठ पोलीस अधिकारी न्यायालय परिसरात दाखल झाले. सुरक्षेच्या दृष्टीने संपूर्ण न्यायालय परिसर रिकामा करण्यात आला. न्यायाधीश, वकील, कर्मचारी आणि पक्षकारांना तातडीने बाहेर काढण्यात आले.

परभणी आणि हिंगोलीतही पोलिसांची धावपळ

परभणी जिल्हा न्यायालयालाही धमकीचा ई-मेल मिळाल्याची माहिती समोर आली आहे. यानंतर परभणी पोलिसांनी तातडीने सुरक्षा उपाययोजना सुरू केल्या. बॉम्बशोधक व नाशक पथक, श्वान पथक आणि पोलिसांची विविध पथके न्यायालय परिसरात दाखल झाली. संपूर्ण परिसराची तपासणी करण्यात येत आहे.

दरम्यान, हिंगोली जिल्हा व सत्र न्यायालयाच्या अधिकृत ई-मेल आयडीवर सकाळी 11 वाजण्याच्या सुमारास धमकीचा संदेश प्राप्त झाला. या घटनेनंतर बॉम्बशोधक पथक, श्वान पथक, शहर पोलीस आणि स्थानिक गुन्हे शाखेचे अधिकारी न्यायालयात दाखल झाले. न्यायालयाच्या संपूर्ण इमारतीची तपासणी सुरू करण्यात आली आहे.

बीड जिल्हा न्यायालयही रिकामे

बीड जिल्हा व सत्र न्यायालयाला बॉम्ब ठेवल्याचा धमकीचा ई-मेल प्राप्त झाल्यानंतर परिसरात एकच खळबळ उडाली. सुरक्षेच्या कारणास्तव न्यायालयाची संपूर्ण इमारत तातडीने रिकामी करण्यात आली. न्यायाधीश, वकील, पक्षकार आणि कर्मचाऱ्यांना बाहेर काढण्यात आले.

घटनेची माहिती मिळताच वरिष्ठ पोलीस अधिकारी घटनास्थळी दाखल झाले. पोलिसांकडून न्यायालय परिसराची तपासणी सुरू करण्यात आली आहे. तपासणी पूर्ण झाल्यानंतरच धमकीबाबत अधिकृत माहिती समोर येणार आहे.

सायबर पोलिसांकडून ई-मेल पाठवणाऱ्याचा शोध

राज्यातील विविध जिल्हा न्यायालयांना एकाच प्रकारच्या धमकीचे ई-मेल प्राप्त झाल्याने तपास यंत्रणांनी या प्रकरणाला गांभीर्याने घेतले आहे. ई-मेल नेमका कोणी पाठवला, तो कुठून पाठवण्यात आला आणि या धमकीमागे कोणाचा उद्देश आहे, याचा शोध सायबर पोलीस आणि गुन्हे शाखेकडून घेतला जात आहे.

बीड पोलिसांकडून पोलीस निरीक्षक शितलकुमार बल्लाळ यांनी नागरिकांना शांतता राखण्याचे आवाहन केले आहे. न्यायालयाचे कामकाज लवकरात लवकर पूर्ववत सुरू करण्याचा प्रयत्न असल्याचेही त्यांनी सांगितले. तसेच नागरिकांनी विनाकारण न्यायालय परिसरात थांबू नये, असे आवाहन पोलिसांनी केले आहे.

दरम्यान, धमकीचे ई-मेल प्राप्त झाल्यानंतर राज्यातील न्यायालयांच्या सुरक्षेचा प्रश्न ऐरणीवर आला असून, तपास यंत्रणांकडून पुढील कारवाई सुरू आहे. धमकीमधील दावे खरे आहेत की केवळ अफवा पसरवण्याचा प्रयत्न आहे, हे तपासानंतरच स्पष्ट होणार आहे.