मायक्रोसॉफ्टमध्ये नेमकं काय घडतंय? 60 हजार कर्मचाऱ्यांच्या एक्झिट ऑफरची चर्चा; जाणून घ्या संपूर्ण अपडेट

नवी दिल्ली : जगभरातील आयटी कंपन्यांमध्ये कर्मचारी कपातीचं सत्र सुरू असताना आता मायक्रोसॉफ्टच्या निर्णयाची चर्चा रंगली आहे. जगातील आघाडीच्या टेक कंपन्यांपैकी एक असलेल्या मायक्रोसॉफ्टने कर्मचाऱ्यांना आर्थिक पॅकेजसह नोकरी सोडण्याचा पर्याय देण्याची योजना आखल्याचं वृत्त आहे. या योजनेमुळे टेक क्षेत्रातील कर्मचाऱ्यांमध्ये चिंतेचं वातावरण निर्माण होऊ शकतं. विशेष म्हणजे, कंपनीचा हा निर्णय अशा वेळी समोर आला आहे, जेव्हा AI तंत्रज्ञानातील गुंतवणुकीला मोठं महत्त्व दिलं जात आहे.

मायक्रोसॉफ्टचा मोठा निर्णय; कर्मचाऱ्यांना मिळणार आर्थिक पॅकेज?

मायक्रोसॉफ्टच्या या योजनेअंतर्गत अमेरिका, कॅनडा, भारत आणि ब्रिटनमधील निवडक कर्मचाऱ्यांना स्वेच्छेने नोकरी सोडण्याची संधी दिली जाणार असल्याचं वृत्त आहे. कंपनीतील उपाध्यक्ष आणि त्यापेक्षा कनिष्ठ पदांवरील पात्र कर्मचाऱ्यांचा यात समावेश होऊ शकतो. मात्र, सर्व कर्मचाऱ्यांना या योजनेचा लाभ मिळणार नाही.

कंपनीच्या प्रवक्त्यांच्या माहितीनुसार, काही विशिष्ट टीममधील कर्मचाऱ्यांना या योजनेतून वगळण्यात येणार आहे. यामध्ये डेटा सेंटर, सेल्स आणि मार्केटिंगसारख्या विभागांचा समावेश असल्याचं सांगितलं जात आहे.

नोकरी सोडणाऱ्यांना किती पैसे मिळणार?

मायक्रोसॉफ्टच्या मुख्य पीपल ऑफिसर एमी कोलमॅन यांनी कर्मचाऱ्यांना पाठवलेल्या संदेशात या योजनेची माहिती दिल्याचं वृत्त आहे. कंपनी सोडण्याचा विचार करणाऱ्या पात्र कर्मचाऱ्यांना आर्थिक मदत आणि नोकरी सोडण्याचा पर्याय उपलब्ध करून दिला जाणार आहे. या पॅकेजचं स्वरूप नोकरी संपुष्टात आल्यानंतर दिल्या जाणाऱ्या भरपाईसारखं असू शकतं.

मात्र, प्रत्येक कर्मचाऱ्याला किती रक्कम मिळणार, याबाबतची सविस्तर माहिती अद्याप स्पष्ट झालेली नाही.

AI साठी गुंतवणूक वाढवण्यावर भर; खर्च कमी करण्याची रणनीती

आर्टिफिशियल इंटेलिजन्समुळे टेक कंपन्यांच्या कामकाजात मोठे बदल होत आहेत. AI तंत्रज्ञान विकसित करण्यासाठी आणि ते चालवण्यासाठी आवश्यक असलेल्या डेटा सेंटरसारख्या पायाभूत सुविधांमध्ये कंपन्या मोठ्या प्रमाणावर गुंतवणूक करत आहेत.

याच पार्श्वभूमीवर मायक्रोसॉफ्टकडून खर्चावर नियंत्रण ठेवण्यासोबतच मनुष्यबळाचं पुनर्नियोजन करण्यावर भर दिला जात असल्याचं सांगितलं जात आहे. कंपनीला भविष्यातील तांत्रिक आव्हानं पेलण्यासाठी आवश्यक कौशल्यं असलेल्या कर्मचाऱ्यांवर लक्ष केंद्रित करायचं आहे.

काही प्रकरणांमध्ये नोकरी सोडण्याची ऑफर स्वीकारणाऱ्या कर्मचाऱ्यांना कंपनीतच कायम ठेवण्याचा प्रयत्न केला जाऊ शकतो. संबंधित कर्मचाऱ्यांचं कौशल्य आणि कंपनीसाठी असलेलं योगदान यानुसार असे निर्णय घेतले जाऊ शकतात.

भारतातील कर्मचाऱ्यांचं काय होणार?

मायक्रोसॉफ्टच्या भारतातील कर्मचाऱ्यांसाठीही हा मुद्दा महत्त्वाचा ठरणार आहे. भारतात कंपनीचे सुमारे 23 हजार कर्मचारी काम करत असल्याची माहिती आहे. मात्र, यापैकी किती कर्मचारी स्वेच्छेने नोकरी सोडण्याच्या योजनेसाठी पात्र ठरतील, याबाबत अद्याप स्पष्ट माहिती समोर आलेली नाही.

त्यामुळे भारतातील कर्मचाऱ्यांवर या निर्णयाचा नेमका किती परिणाम होणार, हे पाहणं महत्त्वाचं ठरणार आहे. AI तंत्रज्ञानाचा वाढता वापर, बदलत्या व्यावसायिक गरजा आणि खर्च नियंत्रण यामुळे टेक क्षेत्रातील नोकऱ्यांचं स्वरूप बदलत असल्याचं या घडामोडींमधून दिसून येत आहे.