मिसिंग लिंकवर 1 नोव्हेंबरपासून नवे नियम! कारसाठी 100, बससाठी 80 ची वेगमर्यादा; 'या' वाहनांना नो एंट्री!

मुंबई : मुंबई-पुणे द्रुतगती मार्गावरील बहुचर्चित 'मिसिंग लिंक'वरून प्रवास करणाऱ्या वाहनचालकांसाठी महत्त्वाची बातमी समोर आली आहे. प्रवाशांची सुरक्षितता आणि बोगद्यांमधील संभाव्य अपघात टाळण्यासाठी वाहतूक विभागाने नवी नियमावली जाहीर केली आहे. 1 नोव्हेंबर 2026 पासून या नियमांची अंमलबजावणी होणार आहे. महाराष्ट्राचे अपर पोलीस महासंचालक (वाहतूक) प्रवीण साळुंखे यांनी 26 ऑक्टोबर रोजी यासंदर्भातील अधिसूचना जारी केली आहे.

कार आणि बससाठी किती असेल वेगमर्यादा?

नव्या अधिसूचनेनुसार, मिसिंग लिंकवर खासगी कार, जीप आणि इतर हलक्या खासगी वाहनांना ताशी 100 किलोमीटर वेगमर्यादा निश्चित करण्यात आली आहे. तर प्रवासी बस आणि इतर प्रवासी वाहनांसाठी ताशी 80 किलोमीटर वेगमर्यादा लागू असेल.

'या' वाहनांना मिसिंग लिंकवर नो एंट्री!

मिसिंग लिंकवर सर्व प्रकारच्या मालवाहू वाहनांना प्रवेशबंदी कायम ठेवण्यात आली आहे. यामध्ये ट्रक, कंटेनर, पिकअप व्हॅन आणि टाटा एससारख्या हलक्या मालवाहू वाहनांचाही समावेश आहे. याशिवाय ज्वलनशील, स्फोटक आणि धोकादायक पदार्थांची वाहतूक करणाऱ्या वाहनांनाही या मार्गाचा वापर करता येणार नाही.

मालवाहू वाहनांना कोणता मार्ग वापरावा लागणार?

मालवाहू वाहनचालकांना मुंबई-पुणे द्रुतगती मार्गाच्या जुन्या मार्गिकेचाच वापर करावा लागणार आहे. बोगद्यांमधील सुरक्षितता आणि तांत्रिक बाबींचा विचार करून हा निर्णय घेण्यात आला आहे. संबंधित निर्बंध पुढील आदेशापर्यंत लागू राहणार आहेत.

दरम्यान, वाहनचालकांनी मिसिंग लिंकवर प्रवेश करण्यापूर्वी आपल्या वाहनाला परवानगी आहे की नाही, याची खात्री करावी. तसेच निर्धारित वेगमर्यादेचे पालन करावे आणि बोगद्यांमध्ये विशेष खबरदारी घ्यावी, असे आवाहन महामार्ग पोलिसांनी केले आहे.