शरद पवारांना पुन्हा रुग्णालयात दाखल केलं! पुण्यातून डिस्चार्जनंतर थेट मुंबई गाठली; सुप्रिया सुळेंची पोस्ट चर्चेत

मुंबई : राष्ट्रवादी काँग्रेस पार्टी शरदचंद्र पवार पक्षाचे अध्यक्ष शरद पवार यांच्या प्रकृतीबाबत महत्त्वाची बातमी समोर आली आहे. पुण्यातील रुबी हॉल क्लिनिकमधून डिस्चार्ज मिळाल्यानंतर शरद पवार यांना मुंबईतील ब्रीच कँडी रुग्णालयात पुढील वैद्यकीय तपासण्यांसाठी दाखल करण्यात आले आहे. खासदार सुप्रिया सुळे यांनी सोशल मीडिया पोस्टच्या माध्यमातून ही माहिती दिली. त्यामुळे शरद पवार यांच्या प्रकृतीबाबत राजकीय वर्तुळात चर्चा सुरू झाली आहे.

रुबी रुग्णालयातून डिस्चार्ज, मुंबईत पुढील तपासण्या

शरद पवार यांना प्रकृती अस्वास्थ्यामुळे पुण्यातील रुबी हॉल क्लिनिकमध्ये उपचारांसाठी दाखल करण्यात आले होते. दोन दिवस उपचार घेतल्यानंतर आज सकाळी त्यांना रुग्णालयातून डिस्चार्ज देण्यात आला. मात्र, पुढील वैद्यकीय तपासण्यांसाठी त्यांना मुंबईतील ब्रीच कँडी रुग्णालयात दाखल करण्याचा निर्णय घेण्यात आला.

खासदार सुप्रिया सुळे यांनी सोशल मीडियावर याबाबत माहिती देताना, 'आम्ही बाबांना पुढील तपासण्यांसाठी मुंबईतील ब्रीच कँडी रुग्णालयात दाखल करत आहोत,' असे सांगितले.

हवामान बदलामुळे छातीत कफ आणि अशक्तपणा

मिळालेल्या माहितीनुसार, शरद पवार दुष्काळग्रस्त भागांच्या पाहणी दौऱ्यावर असताना त्यांना हवामानातील बदलामुळे त्रास जाणवू लागला होता. छातीत कफ आणि अशक्तपणा जाणवत असल्याने त्यांचा दुष्काळ पाहणी दौरा रद्द करण्यात आला होता. त्यानंतर त्यांना पुण्यातील रुबी रुग्णालयात दाखल करण्यात आले.

डॉक्टरांनी त्यांना उपचारांसोबत विश्रांती घेण्याचा सल्ला दिला होता. दोन दिवसांच्या उपचारानंतर त्यांना डिस्चार्ज देण्यात आला. त्यानंतर आता पुढील तपासण्यांसाठी मुंबईतील ब्रीच कँडी रुग्णालयात नेण्यात आले आहे.

व्हीलचेअरवरून बाहेर, कार्यकर्त्यांना हात उंचावून अभिवादन

रुबी रुग्णालयातून डिस्चार्ज मिळाल्यानंतर शरद पवार यांना व्हीलचेअरवरून बाहेर आणण्यात आले. यावेळी रुग्णालयाबाहेर उपस्थित असलेल्या कार्यकर्त्यांना त्यांनी हात उंचावून अभिवादन केले. त्यानंतर सुप्रिया सुळे यांच्यासोबत ते मुंबईच्या दिशेने रवाना झाले.

पंतप्रधान नरेंद्र मोदींकडून प्रकृतीची विचारपूस

दरम्यान, पंतप्रधान नरेंद्र मोदी यांनीही फोन करून शरद पवार यांच्या प्रकृतीची विचारपूस केली. पवार यांचे निकटवर्तीय विठ्ठल मणियार यांनी यासंदर्भात माहिती दिली. यावेळी पंतप्रधान मोदी यांनी शरद पवार यांना प्रकृतीची काळजी घेण्याचा सल्ला दिल्याचे समजते.

शरद पवार यांना पुढील तपासण्यांसाठी मुंबईतील ब्रीच कँडी रुग्णालयात दाखल करण्यात आल्याने त्यांच्या प्रकृतीबाबत पुढील वैद्यकीय माहितीची प्रतीक्षा आहे.